Əilyevon sülalə rejimi həni Ozobicon xalqon bə zinhor vardəşe. Im məmləkəti əhali mütləğə əksəriyyət bə ım rejimi orəx beşə həllkardə mübarizə ros bıe ro amadə mandə. Bə har qıley hərəkati umjən qınie rozie ki, İlham Əliyevi dızdə mıjləmi vılo bıkardo.

Isət ım xalq həmən “ana müxalifəti” imitasionə hərəkətonən çok dərəsedə, vindedə ki, əvon 25 sore de ım toyfə hokuməti hənək kardedən, bo əvono muxalifətə roli çok ifa kardedən.

Jıqo qıley məğamədə çe Respublika siyasiə arenadə qıley tojə onoemon bə miyon beşe. Yanvarə manqi 26-ədə 26 qılə partiya və təşkilaton Ozobiçonə Xalqə Hərəkat nomədə qıley təşkilati soxte elan kardışone. Normalə vəziyyətədə ım jıqoən bənine: çünki hokuməti ıştənış tamam iflas kardə, çey əvəz bıe çe xalqi əsasə tələb həmən vəzifəy, əmo “ana müxalifət” ıştə vəzifə icra karde əvəzi, de ım mürtəce rejimi imitasion mübarizə bardedə, demiən bə çey umri dıroz bıe xidmət  kardedə. Bı səbəbən xalq sənibəton qırdə bedə, ıştə əsil muxalifə təşkilati onodə ki, ım dızdə, cinayətkarə rejimi sərnequn bıkardo, nəhayət xalqi çey zülmiku peroxno.

Əmo bə ım tojə təşkilati rəhbəriyyəti nəzər səğandeədə, bə cəvon votəyon quş eğandeədə çəmiyyətiku bə ilham Əliyevi qıley rəğbət bə əməl omedə.

Isətən ovaştəmon bəştə ımrujnə qəpi əsasə mevzu. Sıftə ey məxsusi ğeyd bıkəm ki, ım OXH de “bozə neçi” terrorə təşkilati səvon İskəndər Həmidovi təşəbbüsi onoə bıe. Ey bə məmləkəti həmə ictimai-siyasiə təşkilaton müraciət kardışe, 25 qılə jıqo onoemonə rəhbəron çey dəvət ğəbul kardışone, yəni bə çey sə qırd bin, və ım Hərəkat elan kardışone. Nəinki bə ım mıjləm qırdbəkəson, hətto keşvəri həmə cəmiyyət Həmidovi çanədə duəvoj, dıdimə, dızd və ğoldur bıe çok zınedə. Bə çey ətrof qırd bıəkəsonən çey əxlağədə bıe yəğine. Məsələn, “Ümid” partiya sədr ki, çe “bozə neçi” səvoni rosə tərəfədə nıştedə, parlamenti şahənşahə kresloədə vırə qətə vaxti votedəbe ki, Ozobicon tırkon zəmine, ım bə kii xoş omedəni çe Ozorbiconiku rədd bıbo, bışo. Isət çey həmtoyfə, həmfikir və həmməslək həmonə 26 yanvar mıjləmədə ım fikir sənibəton təkrar kardışe, bə TMH və çey rəhbər Əliəkrəm Hümmətovi ədres xeyli bıhtonon votışe. Az ıştə ım qəpədə ım ğolduri votə bıtonon inkar karde, bənə kali əvomə tolışon ıştəni bə sofi bekarde cəhdədə nim. Əvon bəmə “separatçi” votedən. Əmə bımi çəvobədə votedəmon ki, ım “separatçi”ə yarlıki de həvəsi ğəbul kardedəmon, bə qiy qətedəmon ki, tosə ısət separatçiəti kardəmon ni, çimi bəpeşt əsl separatçiə hərəkati bino bəkardemon və bı roədə şımə “ulu endər” Heydər Əliyeviku nümunə pebəqətemon, de çey roy bəşemon, Tolışıstoni istiğlali bə dast bəvardemon.

Dələdızdə İskəndəri həmonə iclasədə votışe ki, “Yerevanədə Erməni-Tolış dustiəti cəmiyyət onoəşone”, əmo tosə ısət əmə jıqo cəmiyyət onoəmon ni – çimi bəpeşt obənomon.

Im ğolduri votışe ki, “Moskvadə 4 mərtəbəninə Tolışə mərkəz oj kardəşone”. Tosə ısət əmə Moskvadə jıqo mərkəz oj kardəmon ni, çimi bəpeşt 4 mərtəbən nıbo, jıqo mərkəz oj karde ro səy bəkardemon.

Im xəzpuşə odəm votedə ki, quya “tolışon Ozobiconiku co, bə İroni ilhağ bıe”fikri bə nav dodən. Tosə ısət TMH –i hiç qıley fəali nə jəqo məram, nəən jəqo votəyış bıə ni. Əmo bənə İskəndəri ğolduron bə tolışon münasibətədə jıqo hərəkəton dəvom bıko, bəvədə iqlə TMH ne, həmə tolışə millət bəştə tarixiə vətəni- bə İroni devləti ım faşiston zülmiku xilas bıe ro müraciət bəkarde.

Tolışə milliə fəalon bə “bozə neçi” faşistə təşkilati səvoni votə ım hədyanon cəvobi çəş karde vey vaxt tələb nıkardışe. “ tolishstan.com ” saytədə hüğuğşunasə alim Ataxan Əbilovi bey layığinə çəvob doşe, votışe ki, “İ. Həmidov kie? Çey tolışi mevzuədə qəp je həx nişe, çünki dastış bə tolışə xalqi xuni vi bıə. Tosə ısət bımi ro əv bə məsuliyyət cəlb bıə ni. Jıqo məsuliyyətiku bə kəno mande ey həniən bə iştəfo vardedə, bə tolışon munasibətədə nifət peşandedə, bə əmə  vətənpərvərəti həxədə dərs doe pidəşe. Ozobiconi nıpiəkəs ıyo faşizmi kaştəkəson və perosniəkəsonin, Ozorbiconi ən yolə deşmenon məhz jıqo odəmonin”.

TMH fəal Samit Hacıyeviən “ Tolishmedia.org ” saytədə bə ım faşisti qıley çokə cəvob doşe. Votışe ki,

-Im həmonə İskəndər ni ki, 92-93-minə soronədə Daxili Koon vəzir beədə Ozobiconi ərbobə odəmon kəon dəbıridəbe, çəvon molı-mılki talan kardedəbe?

-Im həmonə İskəndər ni ki, Ostoroədə qıley kə de qranatometi jəşe, çəvrey 4 nəfərinə xeyzon ğətl kardışe?

-Im həmonə iskəndər ni ki, bənə həvəşi bə Az.TV bəjiə efir dəfırsie, əyo bə jurnaliston divon qətışe? Demiən ıştə çı cürə qıley həkıtə bıe bə həmə Ozərbaycani nişon doşe?

– Im həmonə İskəndər ni ki, bəştə tırk voteədə, çey bıyə Sərdar Həmidov “İskəndər ğələt kardedə, əmə tırk nimon, kurdimon, Zilani kurd” votedəbe.

– İm həmonə İskəndər ni kİ, Heydər bə hakimiyyət omeədə MM –i bəjiə efirədə bey çokne yaltəğəti kardedəbe, “şımə çımı dayion” votedəbe?

İsət ım ğədər beşərəfə odəm bə tolışon əxalğə dərs doe fikir dəqıniə, votedə ki, ermənion, farson, ruson bo tolışon mərkəzon soxtedən. Əmo həmonə məclisi çey həmfikirə bozə neçionədə hiç kəsi çeyku xəbə nısənışe ki, əqər tı tolışon boştə bıyə zınedəşbu, bəs Ozərbaycanədə jıqo mərkəzon bo tolışon boçi oj kardedəniyon? Boçi de har vasitə çəvon hüğuğon çəvon dasto sedəyon? Əvon jıqo parsi bə miyon nibəvarden. Çünki, həmə i əğidə soybin. Çəvon sədə beyn  ne, peyn heste.”

Tolışə milliə hərəkati navğədəmonədə qıley Mirtağı İspandi`ən ıştə “Facebook” səhfədə bə ım faşisti cəvob doşe ki, İskəndər jıqo nızıno ki, voə voe – rizon qin bin. Çey kardə cinayəton anədə qonin ki,  bənə bəşəriə cinatəyon bo çəvon ittihami müddət ni. Əv bəştə cinayəton mütləğ cəvob doənin bəbe.

Əzizə radioəməson, Respublikadə hadison qardış i kərən bəmə nişon dodə ki, Oz.R devləti tale çe Tolışə milləti navğədəmon qətə siyasiə mevğeku jidastie. Ozər-tırkon ımi çok dərəsedən, bə səbəb bənə İskəndəri dələdızdi və çey siyoqoruhə həvəşiə dastə bə nav dodən ki, əməni bıtorsonon, ıştə həxə mübarizəku esındınon, bənə 93-minə sori çe məmləkəti siyasiə jimoniku bə kəno bınon, demiən tolışon etnosidi bə orəx bırosnon.

Əmo ısətnə tolışon çe 93-minə sori tolışon nin. Əvon həmonə hadisonku ibrət peqətəşone, pand qətəşone. Həni jəqo səhvi təkrar karde həxşon ni. “Bozə neçion” dərsi doe ro çokə “Волкодавон”şon heste. Bənə İskəndəri dələdızdon votə hədyanon əməni nəinki çəmə royku qordınie nibəzne, həmən çəmə əzm və fədakarəti həniən zümand bəkarde.

Zahireddin Ibrahimi.