Tolışə alim iyən ictimoiyə xodim Sabarz Nasirzodə de “TolishMedia” xəbə agentəti Tolışədə komuniston siyosəti həxədə gəp jəşe.

Kobəsonə Tolışi tolışə əholi arədə jigonə fikir heste ki, komuniston yəni bolşevikon bo tolışə xəlği ro vey çokə çiyon kardəşone, çumçıko tolışə zıvonədə məktəbon oj kardəşone. İ tərəfiku ım səroste. Əmmə əgəm de 1939-nə sori bəpeştə omə tarıxiə dovri çok oşno bıbəmon gıləy gırd əks şikili bəvindemon. Soveti hokumət 20-nə əsri 20-30-nə soronədə, əncəx 10 sori mıddətədə tolışə zıvonədə xəyli məktəbon oj kardə bin ki, təğribən bə həmməy tolışə hırdənon imkon dodə be ıştə moə zıvonədə təhsil səy. Im bo tolışə xəlği ro gıləy inğılobiyə gəm be. Tosə bə vaxti vey vaxt be ki, tolışon yodo bekardəşon be ki, ğədimə vaxtonədə çəvon ıştə əlifboşon hest be. 1930-nə soronədə de bolşevikon fərmoni bo tolışə zıvoni bino be “yanalif” nomo əlifbo istifodə kardə bıbu ki, bo tirkə zıvoni ofəyə bə iyən bo tolışə zıvoni mınosib nıbe. Əmma ım həmməy problemon gədə-gədə həl kardə bedə bin. İntasi Soveti İttıfoğədə iberdəmə siyosiə konsepsiyə dəgiş be. 1936-nə sorədə “Sosialistə milləton dıjd karde həxədə” bədnomə fərmon ğəbul kardə be. Bə ğəror oməyn Ozobiconədə əyo jiə həmməy millətonku “Ozobiconıjə sosialistə millət” nomədə i gılə xəlğ soxte ki, tolışonən ım xəlği tərkibədə dəşin.

Bə tolışə milləti mınosibətədə ım etnosidi siyosətış Ozobiconi Respublikə dəvom karde iyən detobə ısət dəvom kardedə. Əmmə diəməkəmon bə ım fakton tolışon, ki həzo-həzo soron mıddətədə ıştə moə zıvonışon hifz kardə ıştəni nə tırk yaanki türk, nəən hətto ozorboyconıj zınedə nin. Hətto ə tolışon ki, de həyfi, ıştə inə zıvoni zınedə nin, ıştə milliə eyniyəti gin kardəşon ni. Tolışə milləti Soveti vaxtonədə de ıştə zidd etnosidə siyosəti əleyh de ovandi mıborizə kardəşe, pantırkiston anti-tolışə siyosəti ziddən mıborizə kardedə iyən hejo bəkarde. Tolışə millət hejo ğalib omə iyən hejo ğalib bome.