Çəmə Boku muxbir xəbə dodə ki, aprelə manqi 29-ədə Bokuədə “Tolışon Sədo” rujnomə aprelə manqi numrə dərc bə.  Im, ımsor çominə, umumən 116-minə numrəy. Rujnomədə şə materialon, məğaləon kırtə vəsə bəşmə nəzə edaştedəmon.

İminə səhifədə çı Tolışi Milli Ruf, şair Əli Nasiri təvəlludi 64-minə sorəqardışı həxədə Respublika Tolışi Mədəniyyətə Mərkəzi sədr Rafiq Cəlilovi təbrik doə bə. Iştə təbrikədə əv ğeyd kardedə ki, çı Tolışi Milli Ruf, şair Əli Nasir Xıdo bəmə bənə qəncinə xəzinə doəşe. Əli Nasir çı tolışi patyorə, kələntərə zoəy, Əli Nasir çı Tolışi Rufe…

Hejo həminə səhifədə çı Respublika Tolışi Mədəniyyətə Mərkəzi Mətbuatə Xidməti Məlumat doə bə. Həminə məlumatədə votə bedə ki, imsor oktyabri 1-ku de tosə 10 Azərbaycanədə əhali de siyahi aşmardəy,  bardə bəbe və həminə prossesədə bəpe har tolış ve aktiv bıbu iyən ıştə milləti bənə tolışi bıdo nıvışte.

İminə səhifədə həmən çı Atabala Babayevi “Befərə zəndon” nominə publisistikə nıvıştəy doə bə. Həminə nıvıştəyədə Atabala Babayev dı qılə vəyə muzakirə kardedə. Qıləy ləzqiə vəyədə həmmə ləzqion xəy-dıvo ıştə moə zıvonədə dodənbu, tolışə vəyədə tolışon ısə xəy-dıvo tırki zıvonədə dodən. Bə Atabala muəllimi sıxan doədə əv qəp jedəni,  votedə ki, çımı qəp bə tolışie, tarsedəm tolışon mıni sənırəson.

Rujnomə dıminə səhifədə şair-publisist Camal Lələzoə “Vəzifəpərəst” nominə hekayə doə bə. Həminə hekayədə muəllif ıştə ğəhromoni simadə vəzifəbozon, de rışvə bə vəzifə şəkəson bə mizon qətedə, çəvon çənnə bə cəmiyyəti ziyon varde bə əhandon rosniedə. Hejo həminə səhifədə şair Nicat Dağlari tojə şeiron doə bən.

Seminə səhifə çı sərredaktor Rafiq Cəlilovi manşetə səhifəy ki, əyo şə “Jukovi plan” məğalədə Cəlilov ıştə məğsədiku qeş-qeşi nıvıştedə. Əv Azərbaycanədə tolışi zıvonədə məktəbon, radio, televiziya, teatr, Azərbaycani Universiteton qıləyədə tolışşunasi kafedra, Tolışə məholədə tolışi zıvoni reqional zıvon be tələb kardedə. Rafiq Cəlilov əyən nıvıştedə ki, holiyədə əv Azərbaycanədə de tolışi zıvoni dışmenon se qılə cəbhədə mubarizə bardedə.

Rujnomə çominə səhifədə çı Şirəli Əlyari “Alimi beəməl” hekoyə doə bə. Əlyar muəllim ım hekayədə kali alimon çoknə tolışi tarixi bəştə nom bekarde həxədə publisistik zıvonədə qəp jedə. Hejo çominə səhifədəən cıvonə şair, çı Aqşin Dadaşzodə tojə şeiron doə bən.

Pencminə səhifədə çı Milli Məclisi deputat Huseynbala Mirələmovi Soveti vəşyənə vaxtonədə Tolışə məholi Liki Nurəvud diədə qədə zoə boştə noxəşinə moə bardero bo i cılmə nuni bardə mubarizə təsvir bə. Hejo həminə səhifədə kali şairon – çı Nurəddin Şaya, Məxsun Perzə, Rufət Baxşıyevi iyən Zahir Əzəməti həxədə kırtə məlumat iyən çəvon kali şeiron doə bə.

Şəşminə səhifədə etnoqraf Nəriman Tolışi “Liki Zuən əhali mənəviyə mədəniyyət” nominə tarixə-etimolijə elmiə tədqiqati oxminə poə doə bə ki, həminə nıvıştəyədə Nəriman Tolışi çı Zuəni əhali nəğməon, əlolon iyən co folklorə numinon həxədə qeş-qeşi məlumat dodə.

Rujnomə 7-minə səhifədə şair-filoloq, ənıvışt, tədqiqatəvon Allahverdi Bayrami “Sıləhuədə bamə vıl” romani seminə vəslə doə bə. Hejo həminə səhifədə çı Baladdin Veşo “Kenə vindənim” nominə ğəzəl dərc bə. Rujnomə həştminə səhifədə çı “Aləm” jurnali sərredaktor, Azərbaycani Jurnaliston ibemoni uzv Vuqar Həmati çı Bəxtiyar Ruşini “Xosə Məhol” kitobi həxədə nııştə dumuton dıminə poə doə bə.

Ijən yod vardedəmon ki, rujnomə həm ım numrə, həmən dəvardə numron handero bə Rafiqibloq sayt dəşe lozime.