TolishMedia informasiyə agentəti Tolışıstoni muxbir xəbə dodə ki, Azərbaycanədə bə tolışə fəalon təzyiğon şe-şe zumand bedə. Boku hokuməti de “Azərbaycanım” nominə jurnali sərredaktori dasti bə karikaturavonə rəssam, jurnalist, Tolışıstoni Masəlu rayoni Bobokujə diy sakin Mətləb Dadaşovi təzyiğon dəvom kardedə. Həminə jurnali sərredaktor Emil Nəsirli çı Mətləb Dadaşoviku bə Masəlu rayoni məhkəmə şikayət kardəşe ki, məvotbən Dadaşovi nıvıştə və “P.S.Nota” sayti dərc kardə  “Sərredaktor məvotbən həmən dəllolebən” nominə məğalədə çəy şərəfi iyən ləyoğəti təhqir kardəşe, çəy ım şərəf və ləyoğəti bərpo kardero bəpe Mətləb Dadaşov bəy 50 həzo mənot təzminat avjor bıko. Holiyədə Masəlu məhkəmə çı Dadaşovi nıvıştə məğalə vığandəşe bə ekspertiza ki, hələ bunum həminə nıvıştəy kom vırədə çı Emil Nəsirli şərəf iyən ləyoğət təhqir bə. Marağinə ko əve ki, Nəsirli ıştə şərəf iyən ləyoğəti konco təhqir be nişon doe əvəzi Mətləb Dadaşovi tolışə separatçı bıe subut karde pidəşe. Əv iddio kardedə ki, Mətləb de tolışə separatizmi təbliği məşğule, de Əlikram Hummətzodə aspardəy Tolış-Mığonə ideyaon pevılo kardedə, Azərbaycanədə milliə ədovəti tospınedə. Holiyədə məhkəmə çı qıləy sayti  məqalə mustəviku de tosə tolışə separatizmi mustəvi ros bə, yəne məhkəmə həminə nıvıştəyədə təhqiri be-nıbe bə oşko bekarde əvəzi de Mətləb Dadaşovi separatçı be-nıbe muəyyən karde məşğule.

Bə yod dənodəmon ki, Mətləb Dadaşov 27 dekabr 2007 – minə sorədə şəhri Sumqayıtədə mənzil hırie ro bə Tərtər rayonu Borsunlu diy sakin Səlimov Telman Ağalari zoə iyən bə “Azərbaycanım” jurnali sərredaktoru , Boku şəhəri Yasamal rayoni Xəlil Rza kuçə  9 unvanədə jiə Nəsirli Emil Rufəti zoə, 22 həzo dollar doəşe. 12 sore ki, ım dı kəs nə çəy mənzili dodən, nəən çəy puli oqırdıniedən.

Bə tolışon təhdid demi orəxedəni, jıqo ki, de Milliə Məclisi deputat,  Əliyevon traybi uzv Adil Əliyevi aspardəy, çəy nezə odəm Vusal Seid Rzazadə bə tolışə aktivisti, çı Tolışi Mədəniyyətə Mərkəzi Boku şebə uzv Fuad Cəlilovi təhdidon omedə ki, separatçiəti nlko, əks holədə bə çey qəvi qıləy qolulə bəje. Fuad Cəlilovi  Vusal Seid Rzazadə bəy nıvıştə ım təhdidon mayə manqi 4-ədə de “facebook” şəbəkə vasitə bə ictimai muzakirə bekardəşe. Hurmətinə radio əməson, əmən ım mevzu dığğətədə obəğətemon. Çey peşonə istiğaməti bəşmə nəzə bərosnemon.