TolishMedia Tolışıstoni muxbir xəbə dodə ki, mayə manqi 3-ədə Tolışıstoni Masəlu rayoni ASAN Xidmət nominə idorə vəyinə məydonədə çı Mədəniyyətə vəzarəti de reqioni mədəniyyətə idaron bə ivrə dəvoniə  “Çı reqiono bə reqion” nominə ofəyəvonəti festivali nubəynə tədbir dəvonyə bə. Festival de marafonə poye bino bə, jıqo ki, festivalədə şirkət kardəkəson sıftə çı Masəlu devlətə atributon muzeyi vəynə məydoniku de tosə  ASAN Xidmət nominə idorə vəynə məydoni poyemon kardəşone. Marafonə poye tədbirədə çı Mədəniyyətə vəzarəti numayəndon, kali xariciyə keşvəron səfətxonə koəkon, reqioni mədəniyyətə idarə rəison, mədəniyyətə koəkon, iyən rayoni əjion şirkət kardəşone, peşo de festivali numayişqahi  oşno bən.

Çı festivali numayişqohə çodoon hejo ASAN xidməti vəynə məydonədə ejənəşonbe. Həminə çodoonədə mısqərəti numunon, məişətə ğabon, tımonə bofteyon iyən co sənətə numunon bə numayiş noəşonbe. Festivalədə çı Masəlu şairon şeironən təğdim kardə bəbin. Bı tədbirədə çı Masəlu “Halay” qrupi ranqbəranqə mahneon bə festivali mehmonon edaştə bən. Peşo bəvon çı tolışə mətbəxi kali təminə hardəyon təğdim bən. Festival de tosə ruji orəxi dəvom kardəşe.