Erməniə rujnomə “Çı Ermənistoni sədo” nıvıştedə: “Ozobiconədə jiə bumiə milləton gıləyni, çı tolışon eyniyəti hifzi problem sorbəsor gıvon bedə. Im məmləkətədə nəinki tolışə zıvonədə teledoyemon iyən rədiodoyemon, həmən məktəbonədə ım zıvoni tədrisən ğədəğən kardə bedə.

Əmma diyə məkəmon ki, Ozobiconədə jiə bumiə milləton vəzyət rujbəruj gon bedə, Boku rejim daim bə həmmə dınyo elon kardedə ki, tolışon iyən co bumiə milləton, ləzgion, avaron, taton çəvon məmləkətədə həmmə huğuğonku istifodə kardedən.

Çımi həxədə geosiyosiə tədğığoton tolışə mərkəzi ekspert, tolışə xəlği huğuğon mudəfiə komitə sədr Zahirəddin İbrahimi Yerevanədə bıə 3-minə beynəlxəlğə tolışşınosəti konfransi vaxtədə votəşe: “Ozobicon duəvojəti kardedə vaxtı ki votedə guya ım kişvərədə jiə bumiə milləton bexətoətiədən. Ozobicon çəmə xəlği de ğəsbkorə metodon assimilyasiyə kardedə iyən eyni zəmonədə bə həmməy dınyo elon kardedə ki, tolışon huğuğon mıdofiə kardedə. Məlume ki, Ozobicon gıləy yolə xətoye nəinki bo ım pesoxtə məmləkətədə jiə bumiə milləton ro, həmən bo həmməy Cənubiə Ğafğazi eğrorəti iyən bexətoəti ro. Im gıləy probleme iyən bəpe həll kardə bıbu. Çəmə xəlği mığovimət arışte mımkun ni. Əgəm hətti i kəs mığovimət kardedə, bızın çəmə xəlği mıborizə dəvom kardedə. Əmə rujbəruj həmray bedəmon!”.