Huğuğə mıdofiəkoron bə jurnaliston mınosibətədə təğibon həxədə
“Ozobiconi siyosiə məhbuson ozodi xoto” ittifoği bəyonotış dərc kardə ki məmləkətədə bə jurnaliston mınosibətədə cinoyətə təğibon mızəmmət kardəşe.
Çı təşkiloti bəyonotədə votə bedə ki, iyunə mangi 12-ədə “realliq.info” internetə sayti sər redaktor İkram Rəhimov bə 5.5 sornə zindonə cəzo məhkum kardə bə. Məhkəmə avış de Ozobiconi Respublikə Cinoyəti Məcəllə “de təhdidon pul bekırnie” maddə taxsırmand zınə.
“Ozobiconi siyosiə məhbuson ozodi xoto” ittifoğ ğeyd kardedə ki, Rəhimovi həbsi səbəb əve ki, əy çı Boku diktator İlham Əliyevi dastək Əli Həsənovi iyən çəy nezə odəmon mənofeon zidd fəoliyətış kardə.
Realliq.info internetə sayton təsisəkə iyən sər redaktor İkram Rəhimov 2018-nə sori oktyabrə mangi 26-ədə de “de təhdidon pul bekırnie” ittihomi həbs kardə bə be.
Comments