Bə “ParsToday” informasiyə agentəti internetə sayti tolışə baxşi məlumoton əsosi, dəvardə rujonədə Bokuədə Umumdınyo Mətbuotə Şurəon Assosasiyə sorinə məclis dəvarde. Çı Boku diktator Əliyevi bə ictimoi-siyosiə məsələon dair koməkkor Əli Həsənovi ım tədbirədə de yolə nıtği votemon ehandəşe. Əy elon kardəşe: “Çəmə dovlət bo KİV inkişofi ro de milyonon vəsoit co kardedə, bo jurnaliston kə dutedə, bə çand sa jurnalisti fəxri nom iyən mukafaton doəşe. Məmləkətədə 240 nomədə rujnomə iyən jurnal çap bedə, 11 gılə umumrespublikə, 13 gılə regional televiziyə, 14 gılə radio fəoliyyət nişon dodə. Sosialə şəbəkəku istifodə kardəkəson mığdor 3 milyon nəfərisən veye”.

Hokuməti rəsmi şəxsi jıgo tarifinə gəp  bə eksperton etirozi səbəb bıə. Meydan TV çı təhlilgər Əliəsgər Məmmədli votəyon bə cəmiyyəti edaştəşe. Məmmədli Respublikədə sosilalə şəbəkə istifodəçion bə hamsuə kişvəron nisbətədə vey bıe səbəbi məhz məmləkətədə ozodə media muhiti nıbeədə vindedə. Hokumətpərəstə mass-media bə əholi obyektivə informasiyə nıdoe səbəbiku, əvon bə sosialə şəbəkə tərəf şedən ki, çəğono sərostə xəbəon bısənon.

Tədğiğatkor jurnalist Xədicə İsmayılova ısə votedə ki, hokuməti bo media vositon xarc kardə milyonon bə ozodə media gəvi dəbaste xıdmət kardəşe. Kaş ki, hokuməti ə pulon xarc kardəş bənəbe, bə ozodə media inkişofiən ım ğədər mane nəbi. İsmayılova əlavən votəşe ki, hokumət bə sosialə şəbəkə yuzeronən divon gətedə. Bə çımi dair çəvon dastədə xəyli fakton hestin. Əli Həsənovi sosialə şəbəkəonədə cəmiyyəti uzvon ıştə fikron ozodə surətədə ifodə karde barədə  votəyonən bə həğiğəti mıvofiğ ni. Əgə Ozobiconi Respublikədə ozodə mətbuotə muhit mıvcud bıəbe, əv “Bemarzə Reportyoron” təşkiloti elon kardə ımsornə Dınyo Ozodə Mətbuoti indeksədə 4 pillə sari enəgıni, 180 kişvəri arədə 166-nə vırədə, bənə de Somali, Efiopiya, Eriteriya məmləkəton i restədə nəmandi.