Sınov harde vərzışi paraolimpiyada keşədə Ozobiconi səçınə komanda əhəş Vəli İsrafilovi bırıncə medal səşe. İconə Kraləti paytaxtədə davardə vərzışkorəti keşi pencminə rujədə Ozobiconi səçınyə komandə sınovi vərzışi usto Vəli İsrafilov de brassi çəmi sınov hardə vərzışkoron aradə perıziyə.

Əv 100 , qəzış bə 1 ləz (dəyğə) sınovış hardə, seminə vırəş qətə. Demiyən jıqo əy bo  “Tokio 2020” lisenziya xalonış qırdə kardə bə XVI Tovostoni Paraolimpiya Hənəkon omujən bey qirəvəş ğəzənc kardəşe. 17 sornəni Vəli İsrafilov Ozobiconi Sınovharde Federatsiyada perəsə.  Bə şımə vir əyən dağandəmon ki, əv İsrafilov Vəli Rəşadəti zoə  Masali rayoni Kanə Alvadi diədə çe moəmo bıə.

Əv 4 – nə İslami Vərzışi Keşədə 10 qılə vərzışkoron reçədə vırəş qətəbe. Çand bəjən Ozobiconi çand qılə vərzışi keşonədə penə poplinkədə vıronış qətə. İsrafilov Vəli 12 sori dılədə 1 numrəynə vərzışkorti nomış sə. Bə 15 sor rəsə Vəli İsrafilov vərzışkorəti usto nom səşe.

Tırkiyədə, Qırcıstonədə, İsrailədə davardə beynəlxəlğə vərzışi keşonədə baxşınoş səşe.  Sloveniya Kranj nomədə şəhərədə davardə beynəlxəlğ sınov harde vərzışkorəti keşədə (25- 26 mart 2017 nə sor) Vəli İsrafilov nuperəson aradə 200 iyən 100 qəzi de brassi sınov harde çəmədə bırıncə medalonış sə. Əy həmən ıştə rekordonış nu kardəşe. Demiyən jıqo 614 balış qırdə kardə. Xıdo bə Vəli İsrafilovi ovand bıdo. Xıdo bı cıvonə vərzışkori ıştə səbəsojə sərzəmin Tolışstonədə vərzışkorəti keşonədə həşi ğısmət bıko!

Sərdor Bunyadov.