Ostoro de ıştə zəmini perəsə “Sədri”, “Ənbərbu”, “Haşimi”, “Həsəni ” “Çampo” “Çıləyə” nomə bırzon dınyoədə cərin. Mande orəxnə soronədə bırzi perosniey bo Tolışstoni zəmini bə qılə ənərentabelə ko oqardə. Navko çe əmə yolon iqlə de bırzi ıştə zımhori əqətin. Şartuki bə kusə əqətin, peş devıni mandə şartuki şekeliyən bo ıştə molon hardero bə kumə bon ədəyn iyən çe əvədə tayə ənəyn. Nav kusə qəte şartuki dinqisə əbəyn, ya har xonəxo ıştə kədə dinqış hestbe yaən ki çe hamusoyə dinqisə əşin.

İronədə jiə tolışon şartuki, tuki fərhənqışon de dəvləti dastqətəti ovcışon karde. Mande çe əmə toni tolışon bı koədə vey bə peşo mandin. Hələ SSR – i vaxti bırz kaşteşon qırd ğədəğə jintono haşteşone. Tolışstoni zəmin oqarde bə SSR – i tərəvəzi hi. De tərəvəzi i həvoədə çay kaşteyən ovc kardə bey. Isətən çonəy vindon şəyton Həydər Əliyevi çe əmə çayə hiyonış vironəş doy karde, tolışon qırd sərqərdon mandin.Nə tuk mande, nə tərəvəz perosniey bedə, nəən çayə hiyon nımandin. Çe əmə milləti bı jıqo sərqərdonə ruj haştə əliyevi tobyon ısətən dılışone çəşonədə rubənd ehaşton ki, məvotbənən əvon həni pandışon qətə bo tolışon holi sutedən çe əvon qərdəni kjəşedən.

Ostoroədə çartuki kuə zavodi oj kardeyən hejo əy nişo doydə. Oxo əmə iqlə de çay ıştəni oqəte əzınimon. Im şəytoni balon bə çe əmə zəmini sə xok ekardən. Har oməkəs delışe qılə ko bino bıkə, əv koən bəsə jəy nıjənə, qılə co ənəcər omedə qırd qılə co ko bino kardə. Tolışon iqlə roşon heste, əv roən əve ki, Tolışon bəpe ıştə zəmini xıvand ıştən bıbun, ıştə dəvlətmədorəti onən!

Bəvədə bəməku yolə şartuki kuə zavodonən bəben , hələ co çiyonən. Çe əmə xəlğ rohət, aşiş, xoşbəxt ıştə zəminədə bəjiey!

Ostoro.

Sərdor Bunyadov.