Şah Əbos Cənnətməkan dılisoxtədə de  bozə neçiyəvonyətiəkə bey. Bə ıştə odəmon əvoti: “Neçiyəvon ki bedə bıbu, bə neçiyəvonəti beşeyədə ıştə dardon viro bekardə, təbiəti dovnədə omandə, jimoni həmə nırəsə çiyon çe əy viro beşədən”.

Neçiyəvonəti ve piyə şah rə-rə de ıştə bozi bə kəvələ, siyokijə, kujkaqineçiyəvonəi beəşi, ıştə çısk poyə nokəon de ıştə peyəqəti. Əv qılə  xomədə dutə bıə neçiyəvonə olət tan əkəy, soyə məşo bə po əkəy.

Bə neçiyəvonəti şah hiç kəynə ıştə odəmon penəqəti, nıəpişe ki,  əvon norohət ya norozi bıbun. Sərkoən ımbe ki, əv təbiəti dovnədə rohətəti, zər-zibo nıəpişe.

Ruj çe rujon Şah Əbos ıştə bozış kulon dılədə pepərə kujkaqi dumo vadoşe. Boz çı kujkaqi dumo ve eqıni, mılxəs, qılə ləlqılə boğədə əvış qəte. Ləlqılə boğ de ləvərə, barzə parçini bə eqırd sə bıəbe, şah nokə parçiniku ovaşte nızınəy. Şah Əbos bəletiku bə so dəşe tovədə mande. Soədə qılə reçinə sığədə ejəbıə, bə roti mandə, şişə divoynə  dıməırtəbəynə kə hestbe. Kə çoçinə bejənəyon, limonə, noncə, ənoə doon iyən co doon  hestbin.  Iştə bozış de kujkaqi pəydoş karde, soyku beşey piyəyedə bo ov peşomero ıştə poş oqəte. Boğəvon honi vırədə çe şah çəşi vədə doyku qılə ənoş çınie, çe əy ovış eqəte bə masxor edaştışe bəy. Şah peşoməşe, i qılə əno ovi masxori  pur karde bəy ve çoçin oməy. Əve boğəvoniku parsəşe:

-Iştı boği həmə ənoon bənəy bımi jıqo ovinin?

-Bəle.

-Im reçinə kə, ım boğ çekiey?

-Imon həmə çımınin. Çımı boğ se şote. Im doon iyən anqıə rəzon həmə az kaştəme, ıştən bə əvon ğolloğ kardəm. Bə hiç xonəxo uspur bedənim.

-Im  reçinə rotı  de kom puli ejənə? Bə hukməti çı boği puliku doyənə doydəş?

-Çı boği ləlqılon həvatəme, ım kəm ejə. Im boğ nekini çımı xıyzoni hardi iyən tankarde doydə, hələ ıştə əmandə pulon bə muamilən doydəm. Əmə hiç kəynə bə hukməti ıştə boğon, həyvonon, zəminonku doyənəmon doəni. Xıdo çe əmə şah jimoni dıroz bıkə, əv hejo ıştə əjiyon barədə faməşe, bə çe əvon hol dəşə, bə əvon koroğış doəni. Bımi səbin əmə həmə bə şah coni dıvo kardəmon, Xıdo çe əy molyətinə jimoni dıroz bıkə!

-Ne,-neçiyəvoni votışe,-tı sərost famedəniş. Qirəm əjiyon doyənə nıdon, keşvər ıştə ləşkəri oqəte əzıni, ləşkər çı əmə keşvəri deşmenonku hovoz kardə, keşvəri dılədən ıştənbəsətiyon navi səydə. Doyənə nıbu, bə keşvəri koəkəon mıjdi çoknəy bədon?

– Az doyənə bə həşə jəydənim, əv çe əjiyon ğarze. Mande bo xəlqi qonin ım doyənon.

Boğəvoni sıxani çe şah famış onıvoxtonoşe. Boğəvonəti çokə pul vardero, bə kə rəsəcəğın boğonku doyənə qırdə kardey barədə sərəncom doy eçınış qəte.

Vaxt dəvarde, jıqo be ki, şah ijən bə neçiyəvonəti beşəbe, ijən bə həmonə boğ dəşe. Boğəvoniku ənoə ovış piyəy. Boğəvoni  qılə ənoş çınişe, çe əy ovış eqəte. Çəş kardəbe ki, masxor pur bəbe, mande ənoku ve kam ov beşe. Bımi əvon har dıynəni hədəyon mandin. Boğəvon ve ğo,xısinə(qəmgin) holədə bə dumo oqarde.

-Bo çiçi jıqo ğo bıəş?-şah parsəşe.-Bo çiçi jıqo di oməyş?

-Çoknəy ğo nıbum? Çe əmə şah ıştə  xəzinə pur kardero bə boğon doyənə noəşe.

-Çe əmə çəşi vədə bıə çiyon nıvindero ku bey lazime. Saati bənav i qılə əno de ıştə ovi masxori pur əkəy, ısət, şah doyənə bırniyə bəpeşt ənoon ıştə oviku qınin. Bımi səbin az de yolə koroği da qılə ənoku i masxor ov bekardıme. Xıdo bə çe əmə doə boli-puriyətiş bə dumo oqordonişe, çumçıko doyənə bıə keşvərədə ovand (xəy-bərəkət) nibəbe.

Imi məsə şah ve hədəyon mande, bə ıştə kardə ko pəşimon be, ıştə dılədə ım doyənə qırdə karde bə həşə jəşe. Boğəvoni sıxanon rostiyəti dəvinədə bekardero, bə əy əjoş dəğande ki, i masxorən ənoə ov bekə. Boğəvoni de i qılə əno ovi qılə masxorış pur karde, bə dəvuşi de şoy-voy edaştışe:

-Xıdo bə çe əmə şah xəşəconi bıdə, çe əy molyətinə jimoni dıroz bıkə, Xıdo əy hejo çe kələntərə İroni şah oqəto, noğo bıdo! Əv doyənəş qırdəş karde bə həşə jəşe, bə ıştə keşvəri əjiyon bəbolətiş oməy. Jıqoşə çe əmə keşvər həniyən bərdoşt bəbe, xəlq de boli-puri bəjiye, çumçıko i qılə qonə doyənə bıə keşvəron əjiyon bevəc jidən.

Boğəvoni sıxanon bə şah dıl nıştin. Bə kə oqardencən, zəminəkaşton, boğəvonon həmə doyənonku ozodış  karde.

Rusi zıvonədə qırdəkə: Teymurbəy Bayraməlibəyov

Peyəqordon: Diana Montgomeri