Ponə sori iğtisadi behrani gıvoninə vaxtədə budcə nırəsey çe arə barde ro, MM xeyli tojə ğanunon ğəbul kardışe, əy pur karde bə sodə zəhmətkəşon giy noşe. Bəvədə ali hokuməti məmuron daima zəngulə jedəbin ki, hokumət həni devləti puli de ğənaəti xarc bəkarde.

Respublika İğtisadiyyat Vəzarəti 2016-minə sori Mərkəzi Entexabatə Komissiya devləti vəsaiton xarc karde barədə hesabat dərc kardəşe. Bə hesabatədə ım dovlətə orğani budcə pulon çı curə ğarət karde oşko bedə. “Azadlıq.info” nıvıştedə ki, 100 dollarə əskinasi hozo karde bə 15 sent bə sə omedə. Əmo MEK ponə sori Referendumi agahnamə ki, ulguş həmonə 100 dollarə əskinasisən gədəlie, bə 25 kopik doəşe hozo  karde. Bo muğayisə ro bıvotəmon ki, haliyyətədə Boku məğəzonədə 12 vərəğinə dəftəri ğıymət bə 15 kopike. MEK bo 1 gıləy bulleteni 1 mənot 72 kopik pul xarc kardəşe. De ım ğıyməton həmonə Referendum bo budcə bə 22 milyon mənot bə sə omə. Sayti muxbiri bə Boku şəhəri gıləy mətbəə muraciət kardəşe. Mətbəə rəhbəriyyəti votəşe ki, jəgo bulleteni bə 15 kopik, agahnomə bə 3 kopik çap karde bo çəvon muəssisə sərf kardə ğıyməte. Muxbir bey voteədə ki, bəs MEK  ım sənədon təğribən 10 bəjəm bə bohoə ğıymət hozo kardəşe, ey cəvob doəşe ki, “bə jəgo məzənnə gorə odəmi de golulə bəjen”

Im cur bədxarciəti çe devləti co orğanonədən, məsələn, AR Latviya səfarətədən  mevcud bıə. “Azərbaycan saatı” proqram bə çimi dair konkret sənədon numayiş kardəşe.

Bımi, həmən bənə bımi Respublika KİV-onədə dərc bıə çanədə fakton Boku hokuməti hiç gıləy cəvob doə nişe. Jıqo gıləy məsəl heste: “Damə nıbe – roziəti əloməte”