Boku diktator bə rışvəxorəti nubətinə “mıborizə” elon kardəşe

Boku diktator İlham Əliyevi bə Xaçmaz iyən Yevlax rayonon tojə icra hakimiyyəti sərdaron təyin kardəşe, bəvon, həmən bə co icra strukturi vəzifədaron dəstur doşe ki, korrupsiya iyən rışvəxorətiku diəro bıbon. Əks təğdirədə bəvon ciddi cəzo bədo. “Azadi radio” bə İlham Əliyevi ım votəyon çı kali şəxson munasibət omutəşe. Milli Məclisi deputat Məlahət İbrahimgızı votəşe ki, “məmləkətədə de korrupsiya həmişə mubarizə bıə, bı barədə hətto devlətə program elan kardəşone, əleydə komissiya onoəşone, bə çanədə odəmon cəzo doəşone.”  

Bə əmniyyətə məsələon dair ekspert İlham İsmayıl`i bə yod vardəşe ki, de korrupsiya mubarizə hələ Heydər Əliyevi vaxtiku bino kardəşonbe. Bə Korrupsiya Əleyh Mubarizə nomədə gıley idarən onoəşonbe, əmo ımi problem həll nıkardışe. Çe Prezidenti bə ım məsələ sənibəton ogarde səbəb əve ki, rışvəxorəti məmləkətədə tiğon kardəşe. Imən məlume ki, korrupsiya həmişə çe petono bino bedə. Bı səbəbən dey mubarizən çe petono bino bənine.

İğtisadşunas Gubad İbadoğlu ğeyd kardəşe ki, orəxnə sori Azərbaycan korrupsiya peytinğədə 30 pillə saru egıniə, ısət 152-minə, yəni korrupsiya iyən rışvəxorəti tiğon kardə məmləkəton restədə vırə gətedə. Çe korrupsiya hələən devləti ğəraron ğəbulədə həll kardə rolış heste, iyən  ım ğəroron icra xeyli dəboxtedə, əvoni xərob və kıltoş kardedə. İlham Əliyevi orəxnə vaxtonədə kali məmuron əvəz karde məsələn çe məmləkəti ictimaiyyəti tərəfo muzakirə bedə. İbadoğlu bı barədə ıştə fikron de Meydan TV əhandon baxş kardəşe. Votəşe ki, əvvəla, bə kadron əvəz karde islahatə nom noe nibəbe, bə səbəb ki, çe vəzifəku şəkəsonən, bə vəzifə oməkəsonən eyni siyasiə ğıvvə odəmonin. Tojə vəzifədaronən hejo kanə siyasəti dəvom bəkarden. Dıminə, orəxnə kadrə əvəzon nepotizmi, yəni ğohombazəti çe Prezidenti kadrə siyasəti əsasə meyar bıe nişon doşe.

TolishMedia

Comments

Be the first to comment on this article

Leave a Reply

Your email address will not be published. Required fields are marked *

Go to TOP