De Tolışi jimon nomədə VHATSAPP – i dastə tolışon dastqətəti Tolışsonədə həmən Ozobiconi paytaxt Boku iyən Sumqaitədə “Tolışi Şinə – Şəkə balon” keş davarde. Çı keşi sərko əv bey ki, tolışə balon ıştə nənə şinə – şəkə zıvonədə şin – şini şeerışon vote.

Tolışi hırdənon bə ıştə zıvoni ğurb noyədə bə yolon nımunəşon nişo doy. Tolışi navəjənon Mehdibəy Səfərov, Nəriman Ağazodə, Əlimardan Şükürzadə, Oktay Əskərov iyən co sipirişə tolışon bı keşədə vırə qətəkəson baxşə edaşteyro bə vıron dəro qıniyən.

Əvon Likədə, Masalədə, Lankonədə, Bokuədə iyən co vıronədə bə şeerə keşi vırə qətəkəson baxşə edaştəşone. Tolish Media sayt ıştə tono bı keşi onəkəson yolə sepas votedə. Xıdo bə ıştə milləti dast qətə har qılə tolışi koməq bıko. Jıqo – jıqo koon çe əmə milləti bə nav bədoy. Çı jıqo dastko dumoş boy. Xıdo koməq bıbu!

TolishMedia.