Polad Aslanovi istintağ bə orəx rəsə

Bə “ParsToday” informasiyə agentəti tolışə baxşi məlumoton əsosi, “Xeberman” sayti sər redaktor, jurnalist Polad Aslanovi istintağ bə orəx rəsə. Çəy jimoni həmro Gulmirə Aslanova bə Meydan TV çımi barədə məlumot doəşe ki, ısət de istintaği materialon vəkilon oşno bedən. Vəkilon bə Poladi əleyh ittihomon dair hiç gıley subut nıbe səbəbiku bə istintaği muraciət kardəşone ki, bə ım cinayətə koy xitam bıdon. Əmo ım vəsadət təmin bıə ni.

Haliyədə Aslanov Devlətə Əmniyyətə Xidməti təcridxonədəy. Çəy kamera sard bıe səbəbiku, səhhətədəş nosazi bə əməl omə. Yanvari 10-də de Gulmirə xanımi vindemonədə ıştə vekonədə gonə dojonku şikat kardəşbe. De ım şikati G. Aslanova bə Respublika Ombundsmani ovardəşe. Çımiən nəticəş əv bıə ki, Poladi kamera 2-3 ruj muvəğğəti normal tosboniəşone, həmən bəştə dəğəte ro bey gıley odeyal doşənoe.

Polad Aslanov ponə sori iyuli 12-ku zindonədəy. Əv bə devləti xəyanət maddə ittiham bedə ki, guya devləti sırr bə xarici xidmətə orğanon dəvuniəşe. De ım maddə ey 20 soriku tosə umrinə zindonə cəzo məhkum karde bəzınen. Jurnalist ım ittihami rədd kardedə, votedə ki, ıştə saytədə Devlətə Əmniyyətə Xidməti həmkaron çe zəvvaronku rışvə tələb karde barədə silsilə məğaləon nıvışte gorə çeyku ğisas sedən. Aslanovi vəkilon fikir jıgoe ki, devləti sırri girəm jurnalist zınedəbu, jəgo əv həni sırr ne, adi gıley informasiyay, və har gıley jurnalisti ey pevolo karde ixtiyar hestışe.  

Gulmirə Aslanova bə Meydan TV votəşe ki, Polad iminə kərə İronədə 2017-minə sori bıə, Kərbəlo və Məşhədış ziyarət kardə. Dıminə kərə 2018-minə sori fevralədə İroni  İslamə İnğilabi sorəgardışədə iştirak kardəşe. Bə vaxti həmonə tədbirədə çe Az.R devləti rəsmi numayəndonən əyo huzurşon bıə. Həmonə sori aprelədə Polad bə hərbi xidməti vəc nomə statusış bıe-bıe bə əskər bardəşone. Əgər əv çe İroni casus bıəbe, bəpe bəvədə əvşon bə hərbi xidmət ne, bə zindonşon dəğandəbe.

İstintaği orəxədə bə Poladi əleyh gıleyən pesoxtə ittiham bə nav doəşone ki, guya əv bə gıley jurnalistı rıjd omə ki, ey bəkışte. Vəkilon votedən ki, həmonə jurnalist məhz çe Devlətə Əmniyyətə Xidməti həmkare, və de ım təşkilati təhriki bə Aslanovi şər ğandedə.

Comments

Be the first to comment on this article

Leave a Reply

Your email address will not be published. Required fields are marked *

Go to TOP