Maməzə Fətiəğə vist sori nezi əbi, kəxıvand bəbe. Əmo əçəy dılədə hejo qləy dığdığə heste be. Əvən çəvon əğıl bə dınyo nome be.

Həni ə tıbə, ə məlo mandənıbe ki , bəvon nıqıno. Lığmoni votəj be şımə de təbii roy hırdən vinde əzınnijon. De co roy mımkune, çəvonən vəzyət çok nıbero puljon nıbe ə əmələcoti sə bırosnon. Çiçən mol- mələ, pəs- məs kaq- kijə hestejon be poəjon tıbəbano ğıbon kıştəjon be, poəyən məlo həx doəjon be, qırd lut bəbin. Umi bə Xıdo mandəbe.

İ şəv bə məməvəvu Kinəxanimi han çəy rəhmətmandə yolə pə Səyd Başi dəşə be. Səyd Başi dədə bəy qləy sef doəj be. Bı nəslədə həmə kəs bə Xıdo lovə əkəy ki, Səyd Başi dədə bəçəvon han dəşo. Əy hanədə vinde, xısusən jə çij doy, bızın nocı, dardı həll be, çoknə bəvoten , bınışt bəştə dini- dəvlət.

Çoko sefıj səy, bo şoy- şoyro zikkəj jəy, peşınyəy, bı zikkə Fətiəğən pelarzəy:
-Bismilla, ha jena çiç be?
– Zə, Rəhmətmandə Səyd Başi dədəm vinde.
– Jə çij doje?
– Ha ıma, sefi vindənij?
– Kıve?
Merdi ha dast novneje hiçij nıvinde.

Qırd osəmə peşt, əştin lapməjon voşne, yonqo səpe binojon karde şəşə qəte. Bo şoy- şoyro de bə maştə nıhitin. Ha Kinəxanımi tikror- tikror qəp jəy hani əhvolot. Çandə soron be, əvon Səyd Başi dədə sefi çaş nıbin bəqəm?!
Həni zınəjone əğılıjon bəbe. Qirəm Kinəxanıni vindəbu Səyd Başi dədə, ısə ən yolə nocıjon əğıl be bero, əçəy bə əğıl mande sadə saye.

Ehanə, rujon, manqon dəvarde. Həmə zınəjone Kinəxanım bə əğıl mandə.
Şəv – ruj maməzə Fətiəğə bə dınyo omə əğıliro nom fik əkəy, əvoti kinə be ıştə moə nomim bənoə, zoə be ıştə pə nomi, Kinəxanım əvoti ne əğıli əzand az nim? Çımı pə moə ni? Hejo çəvon nomono bənom. Hejo tasıb əşi. Bə i ğəror nəznin omey.

Roysə hamsuə jen Qulniso bə Fətiəğə peqındə. Xəbə- ətə səydə, çəşəruşnə doydə həmroj əğıl mandero. Votdə:
-NomXıdo, zoəne bəbe.
– Çı zındəj Qulnisoə hovə?
– Kinəxanimi luz dike, çımı mıjdəvoni ısətiku bekə bıdə.
– Mıjdəvoni bətı ğıbone. Bekardə cifədəj bə penc mənoti doydə.

Fətiəğə omdə bə kə vində həmroj bə doj dəşə. Rə- rə avlodə jenon hile doydə, ıştən şedə nofəbırın Mərconə xalə aspi peşando biyə.

Əğıl dınyo omedə, şo bedən, bo pərero iqlə kəşpor rəstəni.

İ bəjən həməy bənə tokijəy bedən. İyo bə jenon qəvə- qəvə kardən, çiç bu ım qəp? Tı məvot, dınyo çəş oka zoə xəyləği dum heste. Fətiəğə bovə kardəni. Vardən qədə ğındəği, vində ha şəv- ruj nomi fik əkə əğılij dum heste. Rıkin bedə, əlbəsat zındə bımi nom- mom lozim əbıni, hejo duminə əğıl bəvoten, ıştənən ım jenəğəl bızno çiç bəbe?!
Rə bəbə beştə, penıştə bə aspi bışu bə hamsuə di məlo toniku.

Omedə rəstə məlo kəy, hol- əhvoli vale kardə. Məlo boli, tı qləy dıvo bıkə ki, əğıli dum eqıno.
Məlo bino kardə, çiç bino kardə, dıvo fılon- fəsməkon hozı kardə. Aspardedə:
– Həştt qılə dıvom nıvışte, çımono qləy əğıli rostə amədə bınovnən, əmandə haft qıləysə haft ruj- har ruj çı dıvono i qləy de kıtıə muy iən piozə luy sutedəj, çəy duəvuli bə əğıli bukə doydəj, sutəbəpeşt mandə xoki bə haft qıləy ruy ovi doydəj. Oxınnə- haftminə rujiən qləy xun vılo kardəj, qıləy pəs obırij. Bəvindej əğıli dum eqıne.
Fətiəğə: – Pəs nimexo
Məlo: -Bız obırij
Fətiəğə: – Bız nimexo
Məlo: – Mol obırij.
Fətiəğə: – Molən nime.
Məlo: – Zə hiç əkəni, qləy kaq obırij
Fətiəğə: – bə Məlo con ğəssəm, qləy kaq mandəbe əvən ıştı dıvoə həx vardeme.
Məlo: – Bəvədə bışiş əğıli dumi obırij!

Mirfayaz Likməkani
ƏVU