Ozobiconədə Ağstafa iyən Yevlaxi İcra sərdoron dastqir kardə bin. Əvoni dastqir kardə onemonon çe əvon əjiyonku çoknəy pul səy lkəzışon bə video kəşə pevıloşon kardə. Jəqonəy diə kardeyədə ım ve çokə hole. Mande oxo jıqo hol bı Ozobijon nomədə pesoxtə keşvərədə jimoni dəsture. Çı keşvəri prezidentikuş qətə detobə vitse prezidenti iyən çe əvon əğılon həmə pulxorin, həmə rışvə doydən, həmə rışvə səydən. Çoknəy bəvoten “ Moy cılərişəku pıxedə”.

Qirəm Ozobijon nomədə pesoxtə keşvəri pidəşebu keşvəri bə dərghəl varde, bəvədə bəpe iminə İlham Əliyev ıştən, çe əy jen – xıyzon həmə dastqir kardə bıbun. Çe Ağstafa ya Yevlaxi icra sərdoron dastqir karde əve ki, bə çe əvon vırə nuə odəmon bədon, çe əvonki i çıpır pulon bəsten. Mılxəs ım odəm qəte bə çe əyro ni ki, əvon keşvəri çe pulxoronku şuş kardən. Im ko bə çe əyro vindən ki, nuə odəmonku de çıpıri pulon bıstənon. Bıvotəmon, ehanə bə pulxorəti bımandə Liki iyən Lankoni rayoni icra sərdoron Rovşən Bağırov iyən Taleh Qaraşov bəpe ve vaxte qullənışon kardə bəbəy. Oxo əvon çoknəy Liki iyən Lankoni əjiyon eütırnidəbin, jəqoən damədə ıştə koy bardən. 

Ağstafa iyən Yevlaxi icra sərdoron dastqir karde xəbə bə likıjon çoknəy rəsəy, əvon dastonışon rost kardə bə Xıdo dərqo votəşone: Şinə Xıdo bə Rovşən Bağırovi kəynə nubə rəsedə? Hələ votedən lankonıjonən hejo bənəy likıjon bə Xıdo bə lovən. Mande iyo iqlə çiy heste, ki bedəbu bıbu əvonən bomen bo pulxorəti karde.

Taki tolışi ıştə dəvlkətmədoratiş nıbu, ıştən dast- ıştən yəxə nıbu, əmə hejo jıqo con bədomon!

Jıqo – jıqo koon !

TolishMedia