Əgərsə Ğərəbağı 2-minə cangiku nez bə 2 sor dəvardedə iyən kırizison hejo Boku iyən Yerevanı arədə idomə hestışone, əmmo ın arədə Ozərboycon respublikə pırezident İlham Əliyev deştə sıxanon hejo de Ermənion dışmenəti karde iyən nifrəti vey kardedə. Ozərboycon respublikə pırezidentı ın rəftər ki bə Ermənion dımjon doydə iyən bəvon bevəc votedə əçəy jimonədə gıləy addi rəftore.

Əlbəttə ki Ermənion iyən bəşər huğuğı beynəlxalğə təşkilaton ın həğiğətıku xəbəışon heste iyən de kali ruşinfikon kıməgəti oğo bən. Guya Jığonə sıxan karde çı Rəcəb Təyyeb Ərdoğanıku rəsəy bə Elham Əliyevi. Ərdoğanən har vaxt ki bıpyoşe iyən bızno de Ermənion dışmenəti karde iyən nifrəti vey karde roədə gəp jedə.

İlham Əliyevı sıxanon əncəx Erməni millətçion zid ni bəlkəm əv məzhəbi iyən dini barədə jəğo gəp jedə ki dini-məzhəbiyə nifrətən Ğəfğazədə rost bıbo. Əv Ğərəbağı 2-minə cangiku bə peştən çand kərə ıştə sıxanondə ve ruşin ilon kardışe ki əmə Ğərəbağədə millətçion səy sə de asunə mışti jedəmon iyən əvoni məhv bəkamon. Əv ın nifrəti təblığ kardeədə dınyo biton beynəlxalğə təşkilatonkuən kıməgəti pidəşe!

Diğğət bıkəmon ki, İlham Əliyev Ozərboycon respublikə pırezident Ermənion bənə vəşyənə xəlği zınedə iyən ıştə gəpondə ın sıxaniku istifodə kardedə. Əmmo heyrətin ıme ki de ın sıxanon vote Ermənion faşist zınedə! Həmonə xusyəti ki ıştənsə hestışe bə Ermənion, İronıjon, Uruson iyən co xəlğon doydə. Isətən əv cəhd kardedə ki jığonə faşistə ədəbiyyot Ozərboycon respublikədə zumand bıbo.

Yodiku beməkəmon ki 2004-minə sorədə ki Ramil Səfərov gıləy vəşyənə hərəkətdə Ermənistonı gıləy ofiseron de təvə kıştışe de vətənpərvər iyən millətçi unvani tanış kardə be. Diyə bıkən ki jığonə sıxanon iyən jığonə fikoni təblığ karde səbəb be ki Ğərəbaği 2020-minə sori cangədə çı bəşər zidd cangiyə cinayəton Ozərboycon respublikə əsgəron iyən ofiseron tərəfiku şohid bimon.