Xarici mediada Azərbaycani idarə karde band tənğidi məqalon muəllif, cıvonə politoloq Bəhruz Səmədovi avqusti 21-də çoştoni qətə be barədə əçe nənə Zibeydə Osmanova məlumatış doə.

De əçey sıxani, avqusti 21-də saat 16.00-17.00 miyonədə bə çəvon jiə kə 6-7 kəs mulki olətinə xonəxon omən. Əvon ıştənşon bənə Devlət Əmniyyətəti Xıdməti (DTX) koəkon təğdim kardə, kədə nəvəy bardənin be votəşone.

Bəhruz Səmədov hadisəku nim saat bə nav kəyku beşə bən. Əv, de istə dusti vindemon karde şə bən.
Əvon keyku Bəhruzi kompyuteron, telefon, inən bə Bəhruza aid bə çı sənəd bə, həmməşon bardə.
Bardə sənədon dılədə Bəhruz Səmədovi pasport, Azərbaycanədə iyən xaricədə təhsil sə universiteton diplomon iyən əlidəyon bəən.

De Zibeydə Osmanova vote, kədə nəvəy bardə 2-3 saat bə peş Vəfa nomədə ıştəni bənə vəkili təğdim kardə xonəxo bəvonış zənq jə, Bəhruz Səmədovi bə devlət əleyh məqalon nıvışte ro qətə be İddioş kardə. Əçe telefonədə bə Ğaraboğ münaqişə band nıvıştəyon oşko kardə be votə bə.