Mudafiə Vəzarət iyən əçe tabe onemononədə 143 milyon mənot dələmurt iyən israfəti holon band holiədə dəvom kardə məhkəmə proseon qılıədə – Vəzarəti Maliyyə iyən Budcə İdarə navkonə rəhbər, qeneral-mayor Nizami Məmmədov, Hərbi Həvo Ğıvvon Maliyyə xıdməti navkonə rəhbər, polkovnik Cəlal Kazımov, Hışqəro Ğoşunon Maliyyə idarə rəhbər bə polkovnik Bayram Bayramov, Hərbi Dıyo Ğıvvon Maliyyə xıdməti rəhbər, kapitan Vusal Əlizadə məhkəmə bə orəx rəsedə.

Boku Hərbi Məhkəmədə çəvon vəkilon xeyli vəsatətonşon doə, vey məsəlon ikərən tədğiğ karde ricoşon kardə. Dəvardə məhkəmə prosesonəda doə kali vəsatətonən bın səfə mızakirə kardə bən.

Vəsatətonədə qılı, Bayram Bayramovi əçey dələmurt ittihomi məbləği ğəbul nıkarde anqıl bə. Əv, əçe səpe noə 719 həzo mənot dəlumurtəti,, canq şə fəxt bo ehtiyotədə omə xonəxon ehtiyocon ro xarc be iddio kardə.

Hakimi dın məsələ band Mudafiə Vəzarəti Huğuğ İdarəku çəvob çəş karde, hələ orəxnə nəticə nı be votəşe .

Əliydə taxsikoronədə polkovnik Cəlal Kazımovi vəkil təkror məhkəmə muhasibatə ekspertiza dəvone, hərbi hissonədə ko nıkardə holədə bə nom pul nıvıştə xonəxon məhkəmədə damə karde barədə vəsatətonış ros kardə.

Prokurori bın vəsatəti etirozış kardə. Etirozi səbəb, bə həmonə xonəxon kərt ovoştonə pulon bə ki iyən bə kon vırə rəse barədə hərbi hisson maliyyə xıdməti rəhbəron məhkəmədə ifadə doə be bə.
Qeneral Nizami Məmmədovi vəkili mıddəti bə nav ros kardə vəsatəti bın məhkəmə prosesədə diə kardə bə və rədd cəvob doə bə.

Məhkəmə prosesədə vəkilon bə hakimon dığğətşon rosniə ki, taxsikorə xonəxonədə Vusal Əlizadə 101 həzo 532 mənot, Cəlal Kazımovi 110 həzo mənot moliyyətədə mənzılon həvatə, pulon bə devlət hisob noə bən. Vəkilon bə məhkəmə ımi təsdığ kardə sənədonşon təğdım kardə.

Vəkilon ros kardə vəsatətonədə qılıən de Maliyyə və Budcə İdarə Nəzarət və təftiş şebə navkonə rəhbər, polkovnik Rəfael Xələfovi məhkəmədə damə karde barədə bə. Rəfael Xələfovən Mudafiə Vəzarətədə 143 milyon dələdızdəti band dastqir kardə bə xonəxonədəy. Əmmo, əv 2023-minə sori tovostonədə ozod kardə bə. Əçe barədə əliydə cinayət ko bino kardə bə.

Məhkəmə Rəfael Xələfovi i kərən damə karde barədə vəsatətış təmin kardə.
De doə məlumati, Rəfael Xələfov Nəsimi Rayon İcro Hakimiyyəti rəhbər Asif Əsqərovi xışəvande. Əv, navko Səbail iyən Zaqatala rayonon icro rəhbər bə.

Mərkəzi Səçın Komissiya protokolədə Asif Əsqərovi sentyabri 1-də dəvardə parlament səçınonədə 112 numrəninə Zaqatala Səçın Dairəku deputat vıjniyə be ğeyd kardə bə.

Məhkəmə proses istə koy sentyabri 20-də dəvom bəkarde.