“Azərboycon Siyosi Məhbuson Ozodəti” İbemioni siyosi məhbuson nuə siyohış dərc kardə.

De nuə siyohi, 2024- minə sor sentyabri 23-ku tosə dekabri 12 Azərboyconədə siyosi məhbuson hisob 17 kəs ziyod bə 331 kəsi rəsə.

Sentyabri 23-də 319 kəsi nom siyohiədə bə. Tosə ısət 5 kəs ozod, 17 kəs dastqir kardə bə.
Nuə dastqirbəyon veyni Meydan TV, əlidə media koəkon, huğuğ mıdafiəkə Rufət Səfərov, politoloq Azər Qasımlı iyən dindoronin.

“Azərboycon Siyosi Məhbuson Ozodəti” İbemoni məlumotədə, bə siyohi tosə 12 dekabr tarixi barədəşon məlumot qırd karde mumkun bə, de siyosi səbəbon dastqir və məhkum kardə bə həmmə xonəxon nom dənoə be ğeyd kardə bə.
“Siyosi məhbuson siyohi mıtəmadi de nuə dastqir və məhkumon nomi tojə kardə bəbe. Rejim repressiyon dəvom kardə”, – məlumotədə votə bedə.

Nuə siyohı de 331 xonəxo nomi bə 11 qrup poə kardə bə:

jurnalist iyən bloqeron – 25 kəs;
huğuğ mıdafiəkon – 4 kəs;
mıxalifət partiyon və vətəndor cəmiyyəti uzvon – 30 kəs;

milli kamiyon fəolon – 3 kəs;
bə mıharibə əleyh fəolon – 2 kəs;
Seyudlu di koy ro – 2 kəs;
Almaniyaku deportasiya kardə bə siyosi mıhaciron – 5 kəs;
dindoron – 233 kəs;
Tərtər koy ro məhkumon – 4 kəs;
Qəncə koy ro məhkumon – 12 kəs;
tosə jimoni oxo dastqir bəyon – 11 kəs.

Siyohı Sulh və Demokratiya İnstituti direktor Leyla Yunus və “Siyosi Məhbuson Monitorinq Mərkəz” İctimoi İbemoni rəhbər Elşən Həsənovi tərəfo hozzo kardə bə.