Azərboyconi marağon hifz karde ro rışvə seədə ittihom bə alman deputaton məhkəmə bino bedə.

Proses yanvari 16-də Myunhen şəhəri Ali Məhkəmədə dəvonə bəbe.

Yanvari 16-də Myunhen şəhəri Ali Məhkəmədə Bundestaği 2 navkonə deputat-Aksel Fişer iyən Eduard Lintneri məhkəmə bino be barədə Avropa Şura Parlament Assambleya (AŞPA) Almaniya numoyəndə heyəti rəhbər Frank Şvabe sosial şəbəkədə məlumot pevolo kardəşe.

Har dı deputat AŞPA-də bo Azərboyconi marağon xoto lobbiəti karde ro kulli miğdarədə rışvə, bə rəsmi xonəxon rışvə doe ğanuni darıştedə ittihom bedən. Korrupsiya mərəşulədə Bundestaqi 2021-minə sorədə vəfot kardə əlidə deputat Karin Ştrentsi nomən qətə bedə.

In cinoyət ko Avropa Şurada bə miyon beşə və bənə “kırı diplomatiya“ zınə bə korrupsiya mərəşulə bande. De ddilon, Azərboyconi hokumət de soron keşvərədə inson həxon darıştə hesoboton iyən məşvəğəton vəy qəte məğsədi bın onemoni deputaton rışvə doəşe.

Almaniya Sər Prokuratura hələ 2020-minə sori pevolo kardə məlumotədə, Lintneri 2008-2016-mınə soronədə Baltikətrofi keşvəronədə bə bənk hisabon de britaniya şirkəton vasitə Azərboyconiku 4 milyon avro ovoştone votə bəbe. Fişeriən 2015-2016-mınə soronədə 22 həzo avro rışvə se bəyon kardə bedə.

30 sessiyaku iborət məhkəmə prosesi apreli 25-də bə orəx je çəş kardə bedə