Çe Ozobiconi devlətə ideoloqiya pantirkizm bıe həni bo hiç kəsi pınhon ni. Ozər-tırkə cəmiyyəti mütləğə əksəriyyətiən ım purğərəz, bə hamsuə millətion nifrət, çəvon arədə nifağ təbliğ kardə ideya de həvəsi ğəbul kardəşone, ıştə har qəp və dialoqonədə ey təşviğ kardedən. Bı koədə Ğurban Məmmədovi internet kanalən istisna ni. Çe ım tribunaku istifadə kardə ozər-tırkə navğədəmonədə har kəs ıştə tırkə millətçiəti oşko bəyon kardedə, çəvon kali kəson hətto ıştə tırkə faşist beyən votedən, ımi hiçən niyo kardedənin. Ğurban Məmmədov hakanə bəvon oponentəti bıkoən, ümumən əvən bə jıqo mürtəce dınyovindemoni tərəfdare, ey təbliğ kardeku bə kəno okıridəni.

Çəmə “Ozodə Tolışıstoni sədo” radio daimiə əməsonədə qıley – Cahil Hacıyevi mıku bə Məmmədovi de Bəxtiyar Tuncayi debati munasibət nişon doe xahiş kardışe. Azən bə çey ım parsi nəzərən ıştə kutohə fikron bə radioəməson rosniem pidə .

Im Tuncayi çı cürə soxtə alim bıe çey nıvıştə “Tırkon pınhonə tarix”, və ya “Tırkə sakon” kitobonku zınə bedə. Bımi ro çey nıvıştə həmonə həvələ-qəvələon hande, ıştə ğıymətinə vaxti sərf karde hiçən lozim ni. Hejo bə kitobon nomi nəzər səğande kafie ki, ım alimçə çanədə ğərəzin bıe vində bıbo. Əv ıştə jıqo ğərəzkarəti de Ğurbani dialoqədə har kəlimədə bəyon kardedəbe. İllah ki, sıxan çe İroni barədə eqıniədə ozər-tırkə bənə Tuncayi xislətədə bıə odəmon bə cuş omedən, bə çəvon qəv omə har hərzəvu-hədyoni bə İroni ədres votedən ki, bəvon qrant doə fondon vədə ıştə sədağəti nümayiş bıkardon ki, çe jıqo fondon sionistə soybon çəvon nəfəğə nıbıron.

Tunçay bı debatədə votedəbe ki, tırkə millətçiəti əsasə səbəb məvotbən farsə şovinizmebən. İm tam du və bıhtono ibarət qıley ğərəze. İroni devlətçiəti 2 həzo 700 sori dırozi jıqo qıley fakt ni. Əhəməni hokumdar Koruşi Babilistanədə bə əhali bərobərə huğuğ doə ğəror ısət bə həmə dınyo məlume, hiçən təsadüf ni ki, müasirə sivil və mədəniə cəmiyyət ey bənə Bəşəri Hüğuğon təsbit kardə iminə hokumdari zınedə. Dee ğədimə Yunanıstonədən ımi təsdiğ kardedəbin və Aristoteli ım fakt məxsusi ğeyd kardəşe. Isətnə həmə sivil cəmiyyəton ımi ğəbul kardedən, ğeyr-əz Ozobiconi çəmiyyəti.

Tuncay, həmən bənə bey diqər pantırkə ideoloqon ıştə ım fikir de Firdovsi təsvir kardə İron-Turon canqi obaste çəhd kardedən. Hərcənd ki, Firdovsi nıvıştə “Şahnamə” bədii əsəre, müəllifi həmonə vaxtonədə xalqi arədə nəvə rəvayət və nəğılon bə ğələm səşe, müasirə tarixiə elmiə tədğiğat və arxeolojiə kande-koon nəticədə sübut bıə ki miladi IV əsrədə vağeə bıə tosə Xalqon Yolə Kuçi, Miyonə Asiyadə ironzıvonə xalqon jiən. Sakon, massaqeton, toxaron, sarmaton beistisna ironi , yəni ari zıvononədə qəp jəşone. Bımi bənə sübuti arxeoloji tədğiğaton nəticədə çanədə sığə lohon səpe nəğş bıə nıvıştəyon hestin. Firdovsi təsvir kardə Turanən məhz həmonə devron – Əhəməni, Ərşaki və Sasani sülalon hakim bıə həzo sori əhatə kardedə. Tırkon isə bənə qıley əleydə etnosi bə tarixiə səhnə beşe miladi era VI  əsriku bino bedə. Ozər-tırkə alimcəon Bəxtiyar Tuncayən daxil, votəyon, çəvon tırkon tarixi bə miladiku navonə III həzo sori, bə Şumer sivilizasiya obaste cəhdon hiç qıley elmiə əsos nişe, dınyo alimon arədə jıqo qəpon bə rışxani səbəb bedə.

Tuncay İroni tosə 1936-minə sori Persiya nomədə bıe, quya çey bə nav hiç vaxt İron nomədə nıbe fikri bə auditoriya kul epışte pidəşe. Əsil həğiğət isə jıqoe ki, Avropadə bə İroni Persiya votedəbin. İroni hokuməti həmonə sori bə Milləton Liqa müraciət kardışe ki, İroni tarixiə nomi bərğəror bıkardon. Çimi mütərəğğiə cəhət bımədəy ki, Persiya nom iqlə farson ehtiva kardedə. İron nom isə bə ım devləti həmə xalqon aide. Əqər İroni həmonə vaxti hokuməti siyasətədə Tuncay votə farsə şovinizm bıəbe, de çəvon məntiği bəpe hejo Persiya nomi təşviğ bəken, bə Milləton Liqa ım təklifi nəden.

Şərğədə, həmən İroni ıştənədə bə ım devlət, məmləkət və zəminon tarixi dırozi həmişə İronşon votə. Hətto Avesta kitobədə bə Navonə Asiya məkani “Ariyane vadjian”- yəni “ariyon vətən” votedəbin. İroni ğədimiə şahənşahon həmişə ıştə tituli bənə “ariyon və ğeyri-ariyon şahənşah”i ğeyd kardedəbin. Şah İsmayıl Xətaiən 1501-minə sori Təbrizədə ıştən çe İroni şah elan kardışe. Səfəvion ətrofədə qırd bıə xalqonən məhz İroni devləti bərğəror karde ro mubarizə bardedəbin, “İrane ğədim zende əst” çəvon əsasə şüaronədə qıley bıe. Həmonə devri hamsuə devləton tarixiə mənbonədə bə Səfəvion hokumran bıə devləti həmişə İron votəşone. Tuncay və bənə bey faşizm təbliğ kardə alimçəon pesoxtə jıqo ğərəz və bıhonon nəticəy ki, ısət azər-tırkə cəmiyyəti  əksəriyyət bə jıqo xətomandə mərəzi mübtəlo bıə, bə hamsuə xalq və devləton nifrət ruhədə tərbiyə bıən və jəqoən perəsən.

Xıdotərəfə vote lozime ki, Ğurban Məmmədovi bı debatədə obyektivə mevğe qətışe, çeyku parseşe ki, əqər Cənubiə Ozərbaycanədə tırkə millətçiəti olıve səbəb farsə şovinizmebu, bəs Ozobiconədə millətçiəti səbəb çiçe? İyo çe Tuncay soxtəkarə xislət bə meydon beşe, votışe ki, vaxt bımando bey cəvob bədo, 1 saatisən vey bə İroni tərəf həcv və bıhtonon votışe, əmo bə ım parsi cəvob doe ro ıştəku hınə peydo karde nıznışe.

Im alimçə de har vasitə voteş pidəbe ki, ısət İronədə farson de tırkon arədə nifağ heste, çimi səbəbən farsə şovinizme. Əmo əv ıştən çok zınedə ki, haliyədə İroni ali hakimiyyətədə xalqon həmə bərobər təmsil bıən, devləti ali rəhbər ıştən tırke, parlamentədə 100 nəfərisən vey tırkə mənşəninə deputat heste, əvon ıştə fraksiya təşkil kardəşone. Jiqo holədə farsə şovinizmiku qəp jə odəm bəpe bışo ıştəni bə psixiatri nişon bıdo. Bənə bəvon noxəşinon vırə elmiə muəssisə ne, psixi klinikay.

Kurdon həxədə qəp jeədə Tuncay votışe ki, İsrail və Amerika bo əvon xəritə kəşedə, bəvon istiğamət dodə , koməkəti kardedə. Əmo nıvotışe ki, hejo bə pantırkonən koməkbıkon, bəvon istiğamətbıdon, bo əvon xəritə nəğş kardəkəsonən hejo İsrail de Amerikay. Çe Tuncay rəhbərəti kardə “Dırısə Ozərbaycanə ocəğon” təşkilati sponsorən sionistə milyarderon təşkil kardə qrantə təşkilatonin. Çe Tuncay pesoxtə nıvıştəyon nəşr kardə, bey qanorar doə pulonən hejo çe İsrail və Amerika siyasəti və mənafe bə nav doə, Navonə Asiya, ümumən isə müsılmonə aləmi bə əvon tabe kardə cəhdi bəhrəy ki, Bəxtiyarən çəvonku ğida sedə, bə çəvon mürtəce mənafe xidmət kardedə.

Əzizə radioəməson, jıqo dıvuə qəpon təşviğ kardəkəson bə Xıdo noə roy əleyh beşə nohəxə odəmonin. Əvon hiç vaxt bəştə bədxahə nısıği rəse nibəznen. Bımi ro əmə bəpe ıştə həxə mübarizə dəvom bıkəmon ki, jıqo mürtəçe fikrinə ğıvvon bəştə məğsədi rəse nızınon.