TolishMedia informasiyə agentəti muxbir Səbail rayoni məhkəməku xəbə dodə ki, çımiku çand ruj bə nav “ReAl” (Respublikə Alternativ) partiyə uzv Emin Babayevi cinoyəti ko bə mızokirə noə bə. Emin Babayev bə polisi tabe nıbeədə ittihom kardə bedə be.

Məhkəmə əvış de bə polisi tabe nıbe ittihomi taxsırmand zınə iyən de 200 mənoti cəymə kardəşe.

Ğeyd bıkəmon ki “ReAl”-ədə hisob kardedən ki, Emin Babayevi de siyosiə səbəbon təğib kardedən sosialə şəbəkonədə bə çəy nıvıştəyon iyən partiyədə çəy sosial-siyosiə fəoliyəti xoto. Bə yod dəğandəmon ki, E. Babayev mayə mangi 4-ədə həbs kardə bıə be. Dı gılə odəmon bəy nez bıə bin iyən bə polisi şobə bardəşon be. Polisi şobədə çəyku partiyədə iyən sosialə şəbəkəonədə çəy fəoliyəti barədə xəbə səşon be.