TolishMedia informasiyə agentəti muxbir Boku şəhəriku xəbə dodə ki, bə işgəncəon məruz mandə iyən kıştə bıə ozobiconıjə əfsər Səxavət Binnətovi jen Xavər Hagverdiyeva bo ıştə şuyə magi ro 200 həzo mənot kompensasiyə tələb kardedə.

Bə Xavər Hagverdiyeva sıxanon əsosi, çəy şuyə 2017-nə sorədə həbs kardə bə, bə gonə işgəncəon məruz mandə iyən kıştə bə. Əv isror kardedə ki, çəy magi məsuliyət çı Ozobiconi mıdofiə vəzorəti giədəy.

Məhkəmə proses Boku şəhəri 1 numrəynə inziboti-iğtisodiə məhkəmədə dəvoniə bəbe. İminə iclosi vaxtədə vəkil Vagif Əliyevi elon kardəşe ki, bə məhkəmə ğərori mıvofiğ S. Binnətov “səhvən” kıştə bə. Həlbəttə jıgo cəvobədə Əliyevi diktatorə rejimi uslub vey çok zınə bedə.

Bə yod dəğandəmon ki, 2017-nə sorədə “Tərtəri ko” çarçivədə hərbiə ğollığkoron yolə grup həbs kardə bıə be ki dovlətə xəyonətədə ittihom kardə bedə be.