“ParsToday” informasiyə agentəti tolışə baxş xəbə dodə ki, apreli 22-minə ruji Azərbaycani Xalğə Cəbhə Partiya fəal Arif Babayev polison dastqir kardışone, bə səbəb ki, ey ıştə “Fasebook” səhifədə xalqış bə Əli Kərimli dastək bıe dəvət kardəşe.

Suraxani rayoni 30-minə rolisxonə rəis Elnur Əliyevi əv şəxsən kuəşe,  məcbur kardəşe ki, video kamera vədə ıştə səhvi , həmən i kərən jıqoşə Kərimli mudafiə nıkarde bə qiy bıqəto. Babayev bımi rozı bıə ni. Əve polison bey işqəncə doəşone. Bə “Azadlıq.info” sayti doə informasiya əsasən həmonə polisxonə rəis Elnur Əliyev ki, bə işqəncə əməlon rəvoc doəşe, çe İlham Əliyevi bibi nəvəy, həmən Nərimanov rayoni İcra Hakimiyyəti sərdar Abdin Fərzəliyevi yəznəy.

Daxili Koon Vəzarəti mətbuatə xidmətiku bə “Turan” aqentiyyəti parsi cəvobədə işqəncə fakt təkzib kardəşone, votəşone ki, jıqo votəyon absurde. Çimi bə nav dini fəal Hikmət Ağayevən bə becizə ailon komək karde səbəbiku polison dastqir kardışone, bey işqəncə doşone ki, bə ım aksiya maddi komək kardəkəsi nomi çeyku omuton.  Im 2 kəs fəali har qılə bə 30 sutkəninə zindonə cəzo məhkum kardəşone. Orəxnə 2 həftədə 10 nəfər siyasiə fəal polison oqətəşone , 20 sutkəku tosə 30 sutkə bə zindon dəğandəşone.

Bə Repressiya və İşqəncəon Əleyh İctimai Komitə Az.R-ədə karantinə rejimi vaxtiku, ki çe martə manqi 24-ku bino bıə, 17 nəfər ictimai fəal de cinayətə və inzibati xətoə əməlon bə məsuliyyət cəlb bıe barədə bəyonat doəşe. Çe ım Komitə huğuğə mudafiəkaron İlham Əliyevi çe pandemiyaku bəştə siyasiə opponenton əleyh sui-istifadə hərəkəton məhkum kardışone, həmən çey vədə tələb noəşone ki, əvoni azad bıkardo. “Ojə Ğəfğaz” saytiən ğeyd kardəşe ki, karantin elan kardə rujiku Boku hokuməti 3 nəfər jurnalist dastqir kardəşe. Əvon hokuməti bardə siyasət tənğid karde səbəbiku bə jıqo repressiya məruz mandən.

Beynəlxalğə Dini Azadi Komissiyan, ki Amerikadə ğəror qətedə, de pandemiya əlağədar dınyo hokuməton dəvət kardəşe ki, ıştə keşvəronədə həmə dini məhbuson azad bıkardo.