“ParsToday” informasiyə agentəti interneriə sayti tolışə baxşədə xəbə doə bedə ki, Xəbərman iyən Press-az sayton redaktor Polad Aslanov ki, Dovlətə Əmniyyətə Xıdməti tərəfo dastgir bıə iyən holiyədə çəy məhkəmə dəvom kardedə, bə Respublikə tojə sərprokuror Kamran Əliyev iyən tojə Ombudsman Səbinə Əliyeva mırociət kardəşe.

Im ərizədə ğeyd kardəşe ki, 2019-minə sori iyuni 12-ədə DƏX-i həmkaron tərəfo dastgir kardə bıə. Əvışon təhdid kardə ki, girəm bə ittihomnoamə ğol nıkəşo, bə çəy əğıli, jimoni həmro,valideynon sə mısibəton bəvarden. Əvən məcburən bəştə əleyh bıhtonə ifodəon ğol kəşe məcburiyyətədə mandə. Aslanov ğeyd kardedə ki, ım məcburiə etirof çı istintoği dastədə bə çəy əleyh yekanə guya subute. Əy çımi barədə bə navkonə sərprokuror Zakir Ğaralovi, bə çəy sabiğə mıovin Rustəm Usubovi bə vaxtonədə şikat kardəşbe, əmma əvon bımi pape bə nıbin. Aslanov həmən təkid kardedə ki, çəy istintoği prokuratura bıbardo, çunki DƏX ım koədə ğərəzinə tərəfe. Bə səbəb ki, əy deştə jurnalistə tədğığoti çı həmonə təşkiloti həmkaron rışvəxorə əməlon ifşo kardedə be. Hətto çəy məhkəmə hakim Faig Ğəniyevən navkonə Milliə Əmniyyətə Vəzorəti istintoği şebədə ko kardəşe. Tosə ısət çəy məhkəmə 10 gılə işlas dəvardə , əyo vəkili 30 gılə vəsadət bə nav doəşe, əmma çəvonədə hiç gılə həmonə hakimi ğəbul kardəş ni.

Polad Aslanov ıştə ım şikayətədə sərprokurori iyən Ombudsmaniku xahiş kardedə ki, bə çəy koy obyektiv mıhokimə təmin bıkon, iyən ədolətinə ğəror bıkon.

“Azadlıq.info” sayt çımi barədə əlavən məlumot dodə ki, Polad Aslanov de Cinoyəti Məcəllə 274-minə bə dovləti xəyanət iyən 134-minə de kışte ya bə səhhəti gonə zərər je təhdid karde maddəon ittihom bedə. Əmma de dıminə maddə əlağədor Dəyanət Babayev ki, zərərdidə hisob bedə, ıştə şikayətiku imtino kardəşe.