Azərbaycaniku bə milyoner DJ inən əçe şuə de azərbaycani pulşıştə maşini de milyonon funt sterlinq pul bə Britaniya varde etiraf kardə bə peş, çəvon hisobəda mandə 4 milyon funt sterlinq Britaniya Milli Cinayət Agentəti (NCA) tərəfo musadirə kardə bə.

De The Evening Standard qəzeti nıvıştəy DJ Mikaela Jav səhnə nomi zınə bə  İzzət Cavadova inən əçe şuə  Suleyman Cavadovi Santander bankədə 4 qılə əmonət hisobşon musadirə bə.

Azərbaycanə jenı-şuə pulon, vəsaiti 21 ofşor şirkətiku ibarət şəbəkə vasitə inən “niyo kardə formadə” varde dair ittihomon hüquqi mübarizə oğəte ğəror ğəbul kardə bə peş müsadirə kardə bə.

De Britaniya Milli Cinayət Agentəti vəkil Conatan Holl iyuli 5-də votəy müsadirə bə 4 bank hesobon həmmə bə Suleyman Cavadovi nom bə.

Musadirə bə pulon agentəti nəzərdə qətə 6milyon 400 həzo funtisə bə kamən bıbo, NCA mandə pulon musadirə məqsədi ko dəvom karde ro həmmə xarc inən riskon bə nəzəş sə.

The Evening Standard qəzeti nıvıştəy musadirə bə 4 milyon agentəti navədə iddio kardə 14 milyonisə vey bə kame inən Londonəda Cavadovon milyonon ğiymətədə mılkon bıboən, mandə pulon barədə hiç qılı izahat doə bəni.
Ğeyd bıkəmon İzzət Cavadova Azərbaycani prezident İlham Əliyevi mamu, Cəlal Əliyevi kinəy.