In vəziyət ki ımruj Ozərboycon respublikədə bıə mısılmonon jimonədə hakime, dəvardə dıvrani bevəcə vəziyəti səən veye. Həğiğət ıme ki de Şiəon mıborizə karde iyən co xəlğon əsıl-nəsəbi məhv karde Ozərboycon respublikə hukuməti siyasətdə çadoə iyən umojən be, gıləy məxsus vəziyəte ki de Estalinı dəhşətinə dıvrə mığoyisə karde bəbe.

Lozıme nəzədə bıgətəmon ki Ğəfğazədə Ğərəbağ iyən Boku arədə nakonə cangən ın vəziyəti zumand kardışe iyən əçəy nəticonən ruşin bin. In ulkədə Həmmə mısılmonon xısusən Şiəon bovəışon heste ki Ğərəbağı 2-minə cangi dumu mominon vəziyət Ozərboycondə ve bevəc be, iyən ın cangədə çand sa kəs Şiəon kıştə iyən şəhid bən.

Hal-hazırdə Ozərboycon respublikədə məzhəbi dəgişbıe məsələ mımkune, yəne əgəm vəziyət jıği bə na bışo gasbo İslamı din ıyən Şiə məzhəb ın ulkədə bə xəto dəşo iyən məhv bıbo. Gıləy ın nışunəonku ıme ki Turkiyə ıştəni bə Boku nez kardəşe iyən ısət əyo ve nıfuz kardəşe ki de yəğini Şiə məhv kardedə.

Boku hukumət deştə Sekolariyə metodi vəsilə cəhd kardedə ki ın ulkədə İslam iyən Şiə inkişaf pəydo karde na bıgəto. In ulkədə dindaron həxışon ni ki ıştə hırdənon de İslamiyə hicabi bə məktəb bıvğandon. Ozərboyonı dindarə cəmoət parlımentədə nimayəndə yaən davlətiyə məsul bıe zındənin.

Əgərən har kəsi de gıləy nımojəvotə odəmi unvan bıbo əv nizami iyən siyasi təşkilatondə ko karde nibəzne. Əlbəttə ki əgərən dindarəti xusyətonən har kəsi sıfətdə bıvindon deəvi bevəcə rəftorışon bəbe. Təəsufe ki dəvardə 30 sorədə -de Ozərboycon respublikə mıstəğiləti- ve misyoner təşkilaton İslam iyən Şiə məsələ bəji karde navədə təşkil bin.

Gıləy yolə pırablemon ki Ozərboycondə Şiəon dəvon dim bə dimin gıləyən misyoner təşkilatonin. In vəziyət jəğoye ki şəyton pərəstonən ın ulkədə əktivin, əçəvon ofis Bokuədə oj be ki xəlği bə İslami tərəf ogardeyo maneə bıbon.