TolishMedia informasiyə agentəti muxbir Boku şəhəriku xəbə dodə ki, “Bə Ozobiconi siyosiə məhbuson ozodi ittifoği” jıgo məhbuson tojə siyohiş elon kardə. Im siyohiədə 192 nəfəri nom heste ki 9 gılə grupədə təsnif kardə bedən.

Çə məhbusono 8 nəfər jurnalist iyən bloger, 1 nəfər huğuğə mıdofiəkor, 11 nəfər mıxolifə partiya bə təşkiloton uzv, 3 nəfər navkonə Milli Əmniyyətə Vəzorəti “ğıbonon”, 1 nəfər siyosiə girov, 51 nəfər dini, 45 nəfər Gəncə hodisə, 14 nəfər ısə umrinə məhbusonin.

Ğeyd bıkəmon ki, “Bə Ozobiconi siyosiə məhbuson ittifoğ” 2018-nə sori orəxədə “Sulhi iyən Demokratiyə İnstituti” direktor Leyla Yunusi, “Siyosiə məhbuson monitoringi mərkəzi” rəis Elşən Həsənovi, huğuğə mıdofiəkor Hilal Məmmədovi iyən Ozobiconi ruşinfikon şurə sədr Eldəniz Guliyevi tərəfo bə vıcud omə.

Bə yod dəğandəmon ki, Ozobiconədə siyosiə məhbuson mığdor oxonə haftonədə de iyulə mangi 14-nə ruji aksiyə bəpeştə mıxolifətəvonon həbson səbəbi iberdəmə yol bıə.