Arsaxi prezidenti mətbuoti kotib Davit Babayani bə Ozobiconi prezident İlham Əliyevi eloni ki, Ğərəboği məsələ bəzne əncəx çı Ozobiconi ərozi bitovəti çarçivədə həl kardə bıbu, reaksiyə doəşe.

Davit Babayani de “tert.am” erməniə xəbə agentəti mısohibədə elonış kardə: “Ozobicon veymillətinə məmləkəte. Əv mımkun bıə harçi bəkarde bo Arsaxi nızıne ro, əmma oxoyədə məcbur bəbe ımi bıkə, əncəx məlume ki detobə oxoy Arsaxi mıstəğıləti zıne bə təxir ebəğande. Ehanə ım proses bə vırə bırəso, Ozobiconədə jiə co xəlğonən bəznen bo ıştə mıstəğıləti tələb karde ro realə gəmon bığandon”.

Sıvoy çımi Babayani həmçinin ğeydış karde ki, bə Arsaxi “yolə muxtariyəti” doe, çoknə ki Bokuədə elon kardedən, bo Ozobiconi Arsaxi mıstəğılətisə həniən vey mənfiə təsirış bəbe, çumçıko co xəlğonən muxtariyəti tələb bəkarden, ki sıbut bəkarde ki, Ozobicon gıləy “pesoxtə” dovləte.