“Bravo” hipermarketədə bə inkassatori silahinə hucumi bə peş cinayəti kardeədə şəkkin zınə bə Ruhlan İsmayılov hadisə ruji şanqovoni Boku Fəvvaron meydonədə bə mənzılon qılıədə dəvonə polis əməliyyati nəticədə kıştə bəbe. Hojo həmonə vaxt bə mənzılədə jiə İsmayıl Hacızadə de Cinayət Məcəllə 234.1-1 (havate məğsəd nıbə kulli miğdarədə narkotik bə dast varde , kırnie , oğəte ) maddə qətə bəbe.

24 sininə İsmayıl Hacızadə holiədə Boku Qonə Cinayəton Məhkəmədə muhakimə bedə. İyuni 25-də əçe koy ro məhkəmə proses bino bə. Əçe bə kə dustoğəti vadoe həxədə vəsatət ros kardə vəkil, narkotik ittihomi beəsos be bəyonış kardə.
Cinayət ko materialonədə, Səbail rayon, 9-minə polis xonə koəkon 4 mart saat 21.30-də İsmayıl Hacızadə kuçədə oğəte, əçe cifo 2 ğramisə vey heroin beşe iddio kardə bedə.

De İsmayıl Hacızadə sıxani , əslində əv jimon kardə kədə qətə bə. Çumçoko hojo həmonə vaxt kədə dəvonə əməliyyatədə, polison əçe çəşi vədə “Bravo” hadisədə şəkkin zınə bə Ruhlan İsmayılovşon otəşinə silahiku jə. De ittihom bə maddə İsmayıl Hacızadə 3 soriku tosə 8 sor cəzo çəş kardedə.