Nəğıl nəğıli qozəştə

Ostmoni qo pevaştə

Jəşe ləğe Xansənəmi,

Penc dandonış arışte.

Qıləy hestbe, qıləy nıbe. Qılə qələvonə merd hestbe. Əv de ıştə jeni jidəbe. Har ruj maştəvo qələ bə kəfşən bo çovniero əbəy, toyk darışiədə oəqardi əvoy bə ıştə kə. Poz beşe, zımıston nez be. Merdi osəməşe, həni sardışe, bə sardi petove zındəni. Əve şamqo bə jeni ovardışe:

-Jenə, az har ruj de qələ bə kəfşən beşedəm. Həni sardon eqınidən. Duki peqət, paşmədə toğ bırışt,bomoro pəsə paşmədə qıləy şəy bıboft. Qələ bo çovniey bardeyədə təlo jintono tan bəkardem,sariku əlarznim. Jen rozi be. Maştənəy merd ijən əyşte, şe bə kəfşən. Şamqo oqarde, oməy, vindışe, nə duke, nə çoə. Jeni bo əy şəy boftero həşəşni.

Parsəşe: -Jenə, bəs  tı bomoro şəyı nıbofte?

Jen bə i qəv oqard bıvot: -Ne, merdə, hələ fırım əyştəni.

Merd damə nıbe.Iştə kuəpoloş harde de rəciə moy, qınie hıte. Maştəvo əyşte, ijən şe bə kəfşən. Şaaqo oməy vindışe, nə paşməy, nə toğ. Parsəşe: -Jenə, bəs tı bomoro şəyı nıbofte?

Jen bə i qəv oqard bıvot: -Ne, merdə, hələ fırım əyştəni.

Merd ijən damə nıbe, ıştə səş şodoy hıte. Har şamqo, oşamqo jeniku əparsi, əvindi jeni hiç çiş kardəşni. Jıqo-jıqo zımıston daməy. Viyəvonə merd sardiku larze-larze maştəku detobə şamqovə qələ əçovni. Zımıston dəvarde, xışmətinə əvəsor oməy. Tolışə məhol ıştə reçinə havzə olətış tan karde. Doon zizəşon oj karde. Həşi cınqə bə zəmni qıniey, əvış bə ocımış varde. Kəmrəku, bəşi voə ov be, bənəy şulə ru bey Vazəru. Qılə ovəbarz be ki, tı boy bə təmşo!

Merdi vindışe, həvo muze, çəsponi qələ noğo doyro əvış pekarde bə bandi bəş. Iştən ovəyzi dılədə, qırd muliskə, oməy bə ıştə kə, binim, kə-bə kom holədəy? Vindışe, ne, kə bəmande ovi jintono, votışe:

-Haydə, jenə, hozo bıbi, çiyo beşey lazime, ovəyz əməni bəbarde. Jenı-şuə omujən bin bə yəndı, beşin, peşışon noy bo qələ tono şeyro. Roy miyonədə ru hestbe, bəy ğoymə ovəyz oməbe. Merdi vindışe çe əy ım befərosətə jen bətase, əvış peqəte bə ıştə kul, ıştənış jəy bə ruy ovi. Hejo dı- se qəmış şodoəbe ki, jeni votışe:

-Merdə, bəpe paşmə de dukim peqətəbəy, ısət fırım əyştə bo şəy dute. Merd qırd rıkno be:

– Iştı ço onıkuşiyo, jen! Dı qılə semone bo şəy boftey ıştı fır əyştənıbe, ısət bə ım ovəbarzi, ruy miyonədə əyşte?

Merdi ğıyziku dılışbe, jeni bıdə bə ovəyzi və. Jeni bəy xəyləki lovəş karde, sıxanış doy ki, həni jıqo əkəni, koy çe əy vaxtədə bəkarde.