Boku şəhəri apellyasiyə məhkəmədə fevralə mangi 15-nə rujədə de hakim Həsən Əhmədovi sədrəti xeberman’com sayti təsisəkə Polad Aslanovi ğərori şikati diə karde məhkəmə bə orəx rəsə. Şikat rəd kardə bə iyən Boku apellyasiyə məhkəmə iminə instansiyə məhkəmon ğəror ğıvvədə ogətəşe.

Çı Aslanovi jen xəbə doəşe ki, diə məkəmon ki məhkəmə proses oj be, bə media nımoyəndəon bə salon dəşe icozə doəşonni, bo 16-nə ruji ənəhardə aksiyə dəvoniə Polad Aslanoviən oxonə sıxan votəşe. Aslanova votəşe: “Polad vey pəleşk be, çəy daston larzedəbin iyən əv de çətini ıştəni ogətedəbe.

Əy hakimiku nıştə vırəyku sıxan vote icozə piəşe”. Bə çəy sıxanon əsosi, ıştə şu tikror kardedəbe ki, əv de siyosiə səbəbon təğib kardə bedə. Əy həmçinin votəşe ki, vəsyət hozı kardəşe iyən ehanə vəfot bıkə, məsuliyəti məmləkəti hukməti səpe noedə.

Gyulmirə Aslanova ğeydış kardə ki, ıştə şu bə ənəhardə aksiyə dəvom kardedə, eyni zəmonədə əv tibbə nəzorəti jiədə ni, həniən vey, əy adiə kamerədə ogətedən. Bə yod dəğandəmon ki, noyabrə mangi 16-nə rujədə xaberman’com sayti təsisəkə Polad Aslanov məhkəmə tərəfo bo İroni cəsusətiədə gınokor zınə bıəbe iyən bə 16-sornə zindonə cəzo məhkum kardə bıəbe.

Bə yod dəğandəmon ki, Aslanov 2019-nə sori iyuni 12-ədə həbs kardə iyən de Cinoyəti Məcəllə 274-nə (dovləti xəyonət) maddə ittihom kardə bıəbe.