Tolışıstonədə koronavirusi vəzyət vey gıvonine
Çı Tolışıstoni şəhəronədə iyən dionədə bə koronavirusi mıbtəlo bıə insonon mığdor bə Boku dovləti co rayonon nisbətədə xəyli veye. Çımi səbəb əve ki, Boku diktatorə rejimi məmləkətədə koronavirusi karantinə mərkəzon çı Tolışıstoni Lankon, Cəliləbod, Ostoro iyən co məntəğəonədə onoəşe. Sıvoy çımi xariciku bə Ozobicon ogardə mərizon bə ım məntəğəon mərizxonəon dəğandedən.
Vey mərağine ki, Boku dovləti kutləviə informasiyə vositəonədə tolışon jimon kardə məntəğəonədə koronavirusi problemi iyən de ım mərəzi angıl bə co problemon barədə hiççi nıvıştə bedəni. Əncəx sosialə şəbəkəonədə de çand gılə yuzeron doə xəbəon koməgi məluməton bə dast varde mımkun bedə. Bə ım xəbəon əsosi, Tolışıstonədə bə Boku dovlət co məntəğəon nisbətədə ən gonə koronavirusi vəziyət həmməysə gone. Tolışə məholi mərizxonəonədə tibbiə xıdmət vey bevəcə vəzyətədəy, həkimon iyən tibbiə mıtəxəssison səviyyə xəyli saruye iyən ım fakton səbəb bedən ki, əvon hətto dəğiğə test analizon diagnoz doe zınedənin.
Ğeyd bıkəmon ki, çımiku çand ruj bə nav tolışə yolə şair Vəlişa bə xıdo rəhmət şe iyən çı şairi jimon kardə Şağləse di əjiyon ıştə əzizə şairi matəmə məclisədə iştirok kardeədə Boku diktatorə rejimi elon kardə karantini ğaydəon darıştışone. Im səbəb be ki Boku hokuməti Şağləse iyın ətrofə dionədə fovğəladə rejimış one. Bə rayonədə pevılo bıə xəbon əsosi, ım mıddətədə təğribən 10 nəfəri vəfotış kardə, əmma həkimon hətto zınedənin çəvonədə çand gılə odəm koronavirusi gorəo bə xıdo rəhmət şə.