Noyabrə mangi 9-minə rujədə Turkiyə parlıment ın ulkə pırezidentı pılan çı Ozərboycon rispublikədə Turkiyə nizami ğıvvon mande məsələ ğəbul kardışe. Əlbəttə ki ın məğsəd 2020-minə sori Noyabrə mangi 17-minə rujədə ğeyd be.

Nəticədə Turkiyə deştə ın hərkəti bə Urusiyə hozıəti çı Ğərəbağ məntəğədə nizami mərkəzi təşkil karde cəvob doydə. Yəne jəğo ki Urusiyə sulh tələbəkə məmuron ıştə vəzifədə bəben; Turkiyə ləşgər Ozərboycon rispublikədə bəmande.

Həğiğət ıme ki Turkiyə nizami ğıvvə ve sorone ki Ozərboycon rispublikədəye iyən ve sorone ki Boku ləşgər Səvet hukumətı metodıku beşəy. Isət bı soronədə Ozərboycon rispublikə de İsrail, Turkiyə iyən Urusi silahon mısəlləh be iyən Boku ləşgər bənə Turkiyə ləşgəri ijən Nato nizami ğıvvon bəy.

Gıləy çı Urusiyə iyən Turkiyə ıştirokinə mərkəz heste əmmo heç kəs əçəy nəticə vindedəni, bı səbəbe Turkiyə ihsas kardedə ki bə dast dəğandəbəy. Nəticədə Ankara hiç çorəış ni sıvoy ım ki Bokuədə bımando iyən bə Maskovə nişo bıdə ki “əmə ıştə bıvon peştədə mandəmon”.

Əmmo ın həğiğət çı Urusiyə siyasətmədaron norohət kardedə, əgərsə kali əvon vote bəznen ki Ozərboycon gıləy mustəğil ulkəy ki ıştə mıttəhidon barədə ıştənsə ğəror ğəbul kardedə. Əmmo kali siyasətmədaronən hestin ki şəv-ruj Turkiyə nıfuz iyən təsirıku gəp jedən ijən de çok-çoki ıştə bevəcə vəzyətiku xəbəşon heste.

Bı səbəbe ki Urusiyə kali təhliləkon hejo tikror kardedən ki Urusiyə bəpe ıştə ın siyosətiku dast bıkəşto iyən de Urusiyə fedrativə mənfəəton əsos hərəkət bıkə. Əmmo Kıremlədə heç kəs bə ın dılsutə koyəzınon gəpi guş doydəni.