Səxavət inən Eldəniz Ağayev dı boon xuliqanəti, bə polisi vəynə zoratiədə ittihom kardə bedən.

Qəbələ rayoni Vəndam ğəsəbədə polisi kuə 12 sininə Dəniz Ağayevi pıə de əçe, amu bə kə dustağəti vadoə be barədə Sər Prokuratura inən Dılətonə Koon Vəzarəti bə ico məlumatşon pevolo kardə.

Əğıli pıə – 1974-minə sori təvəlludin Eldəniz Ağayev de Cinayət Məcllə 221.3 (silah ğismədə istifadə bə əşyonku istifadə xuliqanəti) inən 315-minə (bə hakimiyyət numayəndə vəynə muqavimət və ya zu tətbiğ karde) maddon, əçe boə – 1981-minə sori təvəlludin Səxavət Ağayev isə de Cinayət Məcəllə 221.2.1, 221.2.2 (i qrup xonəxon tərəfo, vəzifə bə vırə rosniə xonəxo muqavimət xuliqanəti) inən 315-minə maddon ittihom bedən.

42 sininə Səxavət Ağayevi dekabri 2-də Vəndam ğəsəbədə sərxoş vəziyyətətədə, beetibarnomə avtomobil rome, maşinədə bə əçe 49 sininə boə Eldəniz Ağayevi bə polison tabe nıbe iddio kardə bedə.
Dekabri 2-də qətə bə dı boon barədə dekabri 4-də Qəbələ Rayon Məhkəmədə, Eldəniz Ağayevi həxədə dəstqirəti, Səxavət Ağayevi həxədə isə kə dustağəteı ğətimko tədbir vıjniə bə.

Dekabri 3-də sosial şəbəkonədə polisi əğıli kuə video pevolo kardə bəbe.

De doə məlumati, polis əğıli kuə bə peş, əvşon de əçe piə de əçe bə Qəbələ rayon Polis xonəşon bardə, şanqo əyoşon oğətə..

Dəniz Ağayevi qon be qorə, dekabrı 3-də şanqovəsə əv bə Qəbələ mərizxonə bardə bıboən, dekabri 4-də maştəvo çəyo bekardə bə. De sosial mediadə povolo bə iddion, əçe çəyo məcburi bekardə be votə bedə.