Çı Ermənistоni sər vəzir Nikol Paşinyan deştə xanımi – Anna Akopyani bə ivrə bə Xərəboğ – Artsax Respublika səfər kardəşe. “News.am” sayt xəbə dodə ki, çı Artsax Respublika lider Bako Saakyan Stepanakerti aeroportədə bə Nikol Paşinyani pişvoz beşə. Çı sər vəziri aparati mətbuatə xidməti votəşe ki, Paşinyan de Artsax Respublika rəhbəron vindemon kardəşe. Nikol Paşinyani bə Artsax Respublika səfəri vaxtədə çı Azərbaycani hərbiə ğıvvon martə manqi 11-ku bə qeşə təlimon start doəşe. Bı barədə çı Azərbaycani Mudafiə Vəzarəti məlumat doəşe. Bə təlimon tosə 10.000 sərbaz, 500 tank, zirehinə iyən xusisiə texnikon, avtomobilon, 300 raketə iyən artilleriya avjoron, tosə 20-i co-co təyinatınə aviasiya cəlb kardə bə. Təlimon de tosə marti 15 dəvom bəkarden.

Bı arədə Ermənistanədə səfərədə bə çı NATO sər katibi Cənubiə Qafqaz iyən Miyonə Asiya kişvəronədə xususiə nümayəndə Ceyms Appaturay`i votəşe ki, “Çı Xərəboği munağişə əncəx de sulhə roy həll karde bəbe”. Əv əyən ğeyd kardəşe ki, çı Xərəboği konflikti həll kardero sıvoy molağatə mizi ətrofədə nışte co ro ni, ım konflikti həll kardero hərbiə ro ni. Ceyms Appaturay`i əyən ğeyd kardəşe ki, oxonə vaxtonədə çı cəbhə təmasə vıronədə aşişəti bərpo be, iyən Ermənistanə Respublika bə sulhə molağati meyl karde bo sulhə sazişi bastero ziyodə stimulon doydə.

Çı Artsax Respublika rəhbəri mətbuatə katib David Babayan ıştə “facebook” səhifə coninə vindemonədə Xərəboğədə ozodə iqtisadi zona soxte barədə qəp jəşe. Ey ıştə votemonədə ğeyd kardəşe ki, Xərəboğədə ozodə iqtisadi zona soxte barədə bəy diasporaku ovardəşone. Babayani ıştə votemonədə ımən məxsusi ğeyd kardəşe ki, ozodə iqtisadiə zona bo devlətiro ve vocibə məsələy, bə hisobən bo ozodə iqtisadi zona çı devləti tərəfo subsidion co kardə bəben. Devlət sıftə bə ozodə iqtisadi zona həmşəhrvandon, peşo əcnəbion cəlb bəkarde.