1-minə baxş

Boku, Sirya, Pakiston, Əfğaniston, kali Çeçenıjon iyən Turkiyəku vığandə bıə nizamiyə ğıvvon çı Ğərəbağı xəlğı navədə qıləy ğəyri-əxloği iyən ğəyri-insoniyə canq təşkil kardəşone. Əvon ın canqədə deştə hiləqərətiyə rəftoron Ozərboyconı hamsuə ulkə yəne İronıən bı canqədə daxil karde pidəşone. In nomerdəti bə vırədə ve ruşin be ki Boku de Ğərəbağı şərğ iyən şimal məntəğədə hıcum karde bə nəticə rəse nıznişe iyən ıştə siyasəti jığo ğərorış do ki ıştəni bə İronı marzi nez bıkən iyən lap İronı sərhədon kənoədə çı Ərəsı ru kənoədə bıə vıronku bə Xoda Afərinı ovə dambə tərəf peşoən bə İron iyən Ermənistanı marzi tərəf bışon.

Naku Ozərboycon Respublikə iyən əçəy teroristiyə qoroponi ki dəy həmro bən ıştə ləşğəri çı Ğərəbağı şərğiyə marzıku ğəror doəşon be yəne əçəvon cəbhə şimali-cənubi bı əmmo bı səbəb be ki nakonə cəbhə bəvonyo sıvoy məğlubəti heç nəticəy doəş ni pidəşone ki Ğərəbağı cənubi məntəğədə yəne çı İronı marzı kənoədə ıştə cəbhə de ğərbi-şərği metodi təşkil bıkən ki qasbo bə Ğərəbağı hıcum kardeədə bə nəticəy bırəson. Isət Ozərboyconı teroriston ıştə peştı bə İronı tərəf iyən ıştə dimı bə Artsaxı tərəf qətedən, ın bı holədəy ki Ermənion ki səpeədən ve çok bəznen ki əvoni məhv bıkən əmmo Ğərəbağı əsqəron heç vaxt bə İronı marzı kənoədə bıə vıron qullə vığandənin bı səbəb ki hamsuəti əxloğinə rəftoriən nəzədə qətedən.

Isət ın vəziyətdə kali tamşoəkonən İronı marzı kənoədə qırdə bən iyən ın canqı vəziyətı nezədə diyə kardən. jığonə hərəkəton kali canqı siyasi iyən nizami təhliləkon nəzədə qıləy taktik bə hisob omedən. Quya ın pırogram çı panturkiston qıləy məğsədonkue ki de kali ıştə cəsuson vəsilə ki canqı tamşoəkon dılədə hozı bedən bə Ozərboyconı nizami ğıvvon xəbə bırosnon. Əlbəttə soşiyəl mediadən kali təsviron iyən filımon hestin ki nişo doydən i qorop tırkon çı İronı marzı kənoədə qırdə bedən iyən bə canqı tamşo kardedən. əçəvon arədə hestin kəsoni ki de nizamiyə kameraon canqı vəziyəti tamşo kardən iyən deştə dastə telefoniən sıxan karde holədən, quyə canqı vəziyəti bə Ozərboyconı nizami qoropon raport doydən.

Əlbəttə ki İronı nizami iyən əmniyəti ğıvvonən ın canqı tamşoəkon tojniedənin. Ərdoğanı qıləy pıroqramonku ın be ki Ermənistan iyən İronı arədə sərhədon ğət bıkə ki əlbəttə ın hərəkətoni ki çəy barədə sıxan kardımone əçəy pıroqramonku bə hisob omedən ki Ozərboycon Respublikə marzi bə Nəxcivanı tık bə tık bıkən peşoən de çok-çoki bə Kaspi dıyo əloğodor bıbon . Turkiyə çı ın pıroqramı təşkil kardeyo ve məğsədonış heste ə cumlədə İron iyən Urusyə arədə əloğon ğət karde, Turkiyə iğtisodiyə əloğon zumand karde de Kaspi dıyo vəsilə.

idoməış heste …

İsa Tolış