NİDA hərəkəti fəol Elmir Abbasov inzibotiə ğaydədə həbs kardə bıə. Bə TolishMedia informasiyə agentəti muxbiri məlumoton əsosi, çımi həxədə vəkil Zibeyda Sadıgova xəbəş doə. Bə çəy sıxanon əsosi, əv de İnzibotiə Xətoon Məcəlləy 206-nə (narkotikə maddəon beğanunə istifodə) maddə gınokor zınə bıə. Vəkili votəşe:

“Im məlumot bo mıni polisi Sumgayıt şəhəri idorəyku təsdığ kardəşone. Haliyədə Elmir Abbasovi Sumgayıti polisi sıftənə dustəği kameradə ogətedən”. NİDA hərəkotədə bə TolishMedia informasiyə agentəti elon kardışone ki, Abbasov çımiku çand ruj bə nav gin bıəbe. Bə NİDA hərəkoti nımoyəndəy sıxanon əsosi, Abbasov sosialə şəbəkəonədə Ozobicon hukməti tənğıd kardedəbe.

Əy votəşe ki, çəy həbs de ımi angıle. Daxiliə Koon Vəzorətiku çımi həxədə hoç gılə kommentari doedənin.