Lankon

Urusiyə İmperatori məhvbıeku bə peşt, yəne 1917-minə sorədə, gıləy gədə dıvrədə de Ozerboycon xəlği Respublikə gıləy baxşi unvani be. Peşoən Ozərboyconı Səvet hokuməti Sosəlisə Respublikə gıləy baxşı unvani be.

1991-minə sorədə, Səvet Hokumətı məhvbeku bə peşt, kali siyasi hərəkətoni çı Ozərboycon Respublikə cənubiyə məntəğə ozodəti iyən mustəğiləti goroş bino be ki nəticədə 1993-minə sorədə de Lankonı şəhəri mərkəzi əsos Tolış-Mığon Respublikə təşkil karde səbəb be.

Əmmo 2 mang ın tojə təşkilbıə Respublikə dəvardeku, Tolış-Mığon Rispublikə çı Boku Hokuməti vəsilə poymol be. Nəticədə lmrujnə Boku Respublikə gıləy baxşondə bə hisob omedə.

Lankonı şəhəri ətrofədə gıləy yolə məntəğə çı Milli parkonku de Hirkan Milliyə parkı nomi ğəror gətəşe ki bəvırədə muxtəlif aləfon iyən həyvonon nığo doydən. Ğəzəl Ağac korfəzədə 250 curə aləfon, 30 curə moyon iyən 220 curə pərəndəon jidən.

Lankon ijən Osınəçu doon ki əvi de “inciə do“ unvani zınedən, məşhure. In inciə do de təbi’i səviədə məntəğədə bəji bedə iyən Hirkan Milli parkədə heste.
De məntəğə xəlği nəğılon əsos osnəçu ovədə ğərğ bedə, bı səbəbe ki bəy “osnə çü” votedən. De tarıxi nışunəon əsosən ın çu kəon gam kardeyo istifodə bedəbe. Boçi ki çəy sute iyən gam karde ve vaxt dəbəkəşe.

Kali curə İronıjə pələngonən Hirkan Milliyə parkədə jiyedən. Boku Respublikə Hirkan nomədə Milliyə park iyən İronı Hirkanı nomədə vişəon 2019-minə sorədə bə Unesco beynəlxalğı mədəni irsı əlovə be.

Çand gılə çı Ozərboycon Respublikə nominə əhandon iyən istedodinə kəson Lankonı şəhərədə moəku bən. Gıləy folklor əhandon gorop “Bacilar” yəan “Hovəon” gorope ki Boku iyən Lankon şəhərədə ve muzik festivalon təşkil kardəşone iyən de tolışə mahneon məşhurin.

Lankon şəhərədə Lankon Rujnomə iyən Televeziyə heste ki de tırki zıvoni fəaliyət kardedən. Bə hovəti peğətəbıə şəhəronku Turkiyədə İskəndərun şəhər, Amerikə Kaliforniyə məntəğədə Monteri şəhər iyən İtaliyədəən Çerveteri şəhəre.

Isa Tolış