Tolışon arədə tojədən rostbıə hərəkət Tolışıstonədə mustəğiləti tələbkarde cərəyani səbəb bıe bəzne?

Jəğo ki zındən tojədən Tolışon mədəni-siyasi cərəyan de itirazinə hərəkətoni vəsilə rostbıe holədəy. In həğiğət səbəb bedə ki çəmə Tolışə əktiviston ve ciddin ıştə movqe Boku Respoblikədə nişodoe holədən.

Co tərəfdəən İron İslam Respublikə ki ıştəni de Tolışə xəlği pıə-moə unvani zınedə ıştə nizami manevrı Tolış-Mığon Respoblikə sərhədondə təşkilkarde pidəşe. In gıləy mıhum iyən zumandə estətus Boku iyən Ankara bardə siyasəti navədəye ki de Pakistan iyən deştə co vəhdətinə ulkəon İronı marzon kənoədə iştirokinə manevr təşkil kardedəbin.

De İron İslam Respoblikə xəbə mənbəon vote əsos, İronı tojədən təşkilbıə manevrən duz çı Ğəfğazı Tolışə məntəğəon sərhədondə bə nav bəşe. In rujon İronı soşal mediyaədə filmon iyən xəboni nəşr bedən ki İronı tojə movqe həğiğəti oşko kardedən.

Dəvardə haftəədə Turkiyə Yeni Şəfəq rujnomə xəbə doəşbe ki ve rə İron çı dınyo xəritəku poymol iyən məhv bedə. In hədərə iddıo cəvobədə İron jəğo ki hiç vaxtən bə Boku iyən Ankara jığonə nodonətiədə bardə təblığon guş doydəni Sentiyabrə mangi 17-minə rujədə əncəx deştə Ardəbil məntəğə imami-cəmoəti vəsilə gıləy estətus vığandışe ki: De şirı dumi hənək məkənən.

Əmmo ın estətusı cəvobədə Boku parlımentı gıləy pantırkə nimoyəndon votışe ki: Şirı dumə bırniyedəmon! Bəznemon vote ki Boku parlımentı pantırkə nimoyəndə ın iddıo əncəx əçəy şəxsi fikir-sıxan ni, bəlkəm ın cumlə Boku-Ankara liderə siyasətmədaron cəvobe ki bəzne İronı ciddinə rəftori səbəb bıbo.

Əmmo ın vəzyət əyo bə gıləy tojə mərhələ dəşedə ki Tolışıstoni gıləy jornalon baş-redaktır ıştə facebook səhifədə xəbə doydə ki guya Pakistanı imincivəzirən ilon kardəşe ki 120-həzo kəs nizami ğıvvon çı Ğəfğazı məntəğə Tolışon siyasiə pırablemon həlkarde gorə bə ın məntəğə bəvğande. Əlbəttə ki Pakistanı imincivəzirı ın sıxanı məno Tolışon ğır karde məğsəde.

Az jığo zındəm ki ın rujondə dəvardə vəzyət nişo doydə ki Tolışon mədəni-siyasi cərəyan ojnən rost bedə. İyo 3 gılə yolə səbəb heste ki cənobi Ğəfğazədə siyasi-jeografiyə vəzyəti ojnən dəgişkarde bəzne. 1. Boku-Ankara naduzgunə bardə siyasəton 2. Ğərəbağədə dəvardə cangi kali təblığiyə nəticəon 3. Nizami-fənni manevron təşkilkarde, xususən çı İronı nizami manevr.

Isət Tolışıstoni lideron bəznen ki ın vəzyətıku çəmə xəlği pırablemon həmmişəlığə həlkardeyo gıləy yol iyən zumandə hərəkət təşkil bıkən. yəne Tolışon arədə tojədən rostbıə hərəkət Tolışıstonədə mustəğiləti tələbkarde cərəyani səbəb bıe bəzne.

İsa Tolış