Siyasi fəal, ıştəni bənə partiya sərdori təğdim kardə Rza Səfərsoy dəstqir kardə bə. Əv de Cinayət Məcəllə 228-minə (ğeyriğanuni silah oğəte) maddə ittihom kardə bedə.

De əçe əvlodon doə məlumati, əv noyabri 24-də Xəzər Rayon Polis İdarə polison tərəfo qətə bə. DE Xəzər Rayon Məhkəmə ğərari bo sıftənə istintağ mıddəti ro 3 manq dəstqirəti ğətimko tədbir vıjniə bə. Əv bə Şuvəlan 3 numrəninə istintağ təcridxonə ovoştonə bə.

Siyasi fəali jimoni həmro Təranə Səfərsoy, polison əçe jimoni həmru kəyku barde, şəvon kədə nəvəy bardə be, kompyuter, telefon peğətə be bəyonış kardə.

Təranə Səfərsoy ğeyriğanuni silah oğəte ittihomi saxta be, əçe sosial şəbəkonədə pevolo kardə tənğidi fikon qorə cəzo doə be votedə.

Rza Səfərsoy navədən “Facebook”platformadə pevolo kardəyon qorə dəstqir kardə bə. 2018-minə sori iyulədə Gəncədə navkonə icra rəhbər Elmar Vəliyevi sui-ğəsdi bə peş sosial şəbəkonədə nıvıştə statuson qorə 7 manq dəstqirəti cəzoş sə be.

Ğaraboğ muharibə veteran Rza Səfərsoy həmən dıminə qrup əlile. Ey, ərteşədə bənə zabiti xıdmətış kardə, əmmo səhhətədə bə problemon qorə təxris kardə bə.