Dı ruje mısılmonə sori iminə manq Məhərrəmə manq daməy. Ozobicon nomədə keşvərədə Tolışstoni zəminədə polison de məhərrəmə manqi dame həmə məsçidınoşon bə ıştə çəşənəvo jintonışon peqətə. Qafqazi Mısılmonon Onemoni bı barıədə ıştə fitfaşən doəşe.

Məhərrəmə manqədə bə məsçidon hiç qılə əğıl ya məktəbədə handə tələbon ome ğədəğəşon noə. Iştə nomi multikultural ya demokrat noə qılə keşvər bo çiçi bə ıştə əjiyon jıqo koroği dodə? Qafqazi Mısılmonon Onemoni sərdor Allahşukur Paşazadə doə jıqo fitfa iqlə çiyku bə əmə xəbə dodə.

1400 sorisən veye mısılmonon de Yəzidi canq kardən, mande Ozobiconədə həni bə Yəzidi bənəy mısılmoni deşmeni ney bənəy dusti diə kardən. Jıqo hol bo şiyə təriqəti , şiyə əğıydə vey yolə darde. İ tono bo İmom Huseyni bəmedən, dıminə tonədə bə Yəzidi biyət vardən.

Imruj Tolışstoni zəminədə məsçidon jıqo bə polison çəşənəvo peqəte ve çiyonku xəbə doydə. De mısılmonə – şiyə əğıydə jıqo hol hiç curə bə ico omə çiy ni. Mısılmonon de jıqo koroğon rozi bey əzınin. Im hukmət həni de ıştə xuni bə hənəke. Xıdo bə əmə ğıryət bıdo ki, çı kofiron ehdəku boəmon. Amin.

Sərdor Bunyadov.