Almaniyə məşhurə telekanalonmgıləyni tərəfo de Azərbaycan hokuməti iyən avropəvıjə məmuron iştiroki zıbudə korrupsiyə koon həxədə məğalə

Almaniyə ARD telekanali tərəfo “Am Abgrund” nomo gıləy film pevılo kardə bə. Diə məkəmon ki, ım bədiiyə filme, əv de “Azərbaycaniə landromat” nomo çand gılə faktikə tədğığoton səpe kəşə bə. Im tədğığoton oşko kardəşone ki, Azərbaycan Respublikə hokumət dırozə soron cərəyonədə bə veyaşmardə avropəvıjə məmuron rışvə doəşe. 2017-nə sorədə pevılo kardə bə tədğığoton oşko kardəşone ki, Azərbaycani hokumət bə co-co məmuron təğtibən 3 miliard dollari rışvəş doə iyən bəvon eşaeşinə səfəron hıriəşe yaanki yolə pulon bə çəvon banki hisobon vığandəşe. Çımi məğsəd əv bə ki ım nıfuzinə avropəvıjə məmuron Avropə Şurə Parlamenti Assambleya iyən hətto Almaniyə Bundestagi zalonədə Azərbaycan Respublikə mərağon mıdofiə bıkən.

Mıstəntiğə jurnalisti kəşə film Almaniyə Bundestagi tərəfo ım sori Fevrali 20-ədə təşkil kardə bə tədbirədə nımoyiş kardə bə. Filmi həm rışvə doə azərbaycanıjon, həmən rışvə sə avropəvıjə məmuron tənğıdış kardə. De ım filmi uyğun, ım hikoyə mərkəzədə həm Azərbaycane, ki de enerjiə resurson gəncine iyən gırd avtoritarə rejimi tərəfo idorə kardə bedə, həmən çı Avropə kişvəron ki, bənə demokratiyə, ğanuni iyən insoni həxon mıdofiəəkəon məşhurin.

Film de Boku dovləti tərəfo daxıliə mıxolifə fəolon tam ke məcbur karde səhnə bino bedə. Əvon rejimi tərəfo bə zindon dəğandə bedən bə insoni həxon dərışte əleyh gəp je gorə. Filmədə veyaşmardə dramatikə səhnəon hestin ki, 2012-nə sori hodisəon təsvir kardedən, vaxtı ki məşhurə jurnalist Xədicə İsmayılova otəğədə məxfiə kameraon noə bən.

Çı filmi ğəhrəmon çı Almaniyə Bundestagi pesoxtə deputat, eyni zəmonədə Avropə Şurə uzv Gerd Maynekene. Mayneken oşko kardedə ki, 1949-nə sorədə təşkil kardə bə oxonə institut ki məğsədış demokratiyə iyən insoni huğuğon zumand karde be, ısət təhlukədəye iyən Almaniyə deputaton bə Azərbaycani rışvəxorə rejimi təsisi məruz mandən. Əvom Avropə şurədə ıştə sədoon de puli iyəm ğızıli mıbodilə kardedən.

Filmədə çı Mayneke veyaşmardə siyosiə məhbuson xoto Azərbaycan Respublikəy tənğıd kardə ğətnomə ğəbul karde cəhd çı şurə co uzvon tərəfo rədd kardə bedə, bə çəy gorə ki Boku dovləti bəvon rışvə doəşbe. Filmi nımoyişi mərosimədə iştirok kardə ğonəğon dılədə almanə deputat Frank Şvab be ki Boku diktatorə rejimi ən yolə tənğıdəvone. 2024-nə sori yanvarədə F. Şvab be ki, AŞPA zımsoni sesaiyə zəmonədə tələbış kardə ki, çı Azərbaycani heyəti etimadnoməon ləğv kardə blbun.

Frank Şvabi ğeydış kard ki, Boku dovləti həxədə həğiğəti vote de Avropə Şurə missiyə gırd uyğune iyən ehanə çım təşkiloti uzv çəy prinispon hurmət kardedəbi, əvon bəpe hərəkət bıkon. De Şvabi sıxanon əsosi, bə Ukraynə cangi səbəbi Rusiyə gazi boykot karde bədigə, Avropə binoş kardə Azərbaycaniku gaz hıriye, əmma vey mıhume ki, əvon insoni huğuğon de ticorə əloğəon səbəbi yodo benıkardon.

Çı Azərbaycan Respublikə yolə tənğıdəvon iyən “Avropə Eğrorəti Təşəbbus” analitikə mərkəzi prezident Cerald Knausi elonış kardə ki, ehanə Azərbaycani hokumət siyosiə məhbuson detobə aprelə mangi ozod nıkardo, mımkune ki, Azərbaycan Avropə Şurəku bekardə bıbu.