Azərbaycan Xalq CəbhəPartiya (AXCP) dəstqirətiədə bə fəal – partiya Nərimanov rayon şebə uzv Elnur Həsənovi apreli 18-ku istintağ təcridxonədə bə hışqə vəşiəti bino karde xəbə doə be barədə əçe ıştən apreli 19-də məhkəmədə məlumatış doə.

2023-minə sori noyabriku dəstqirətiədə bə Elnur Həsənovi ko Boku Qonə Cinayəton Məhkəmədə bardə bedə. Əçe apreli 19-də bo qəp je nıvıştə 11 vərəğ əçe dasto sə bə.

Məhkəmədə prokuror ittihom aktış elan kardə. Bə ittihomi əsas, de Narkotikon Mubarizə İdarə koəkon əvşon Xətai rayon əraziədə qətə, bə polis xonə bardə. Əçe cifo tosə 6 ğrami narkotik beşə.

Bın səbəb bəçe vəynə Cinayət Məcəllə 234.4.3 (bo havate məqsədi kulli miğdarədə narkotik bə daşt varde, kırnie, oğəte) maddə ittihom bə nav doə bə.

Çın maddə sanksiyədə 5 soriku tosə 12 sori ozodətiku məhrumkardə cəzo nəzədə qətə bedə.

Elnur Həsənov ıştəni taxsiko zınedəni, narkotiki bey aid nıbe votedə.

Omə məhkəmə proses may 3-də dəvonə bəbe..