Tolışi sipirişə şair, ıştə jimoni bə tolışə şeeri fidi doə tolışə merd Xanəli Ağayev  Tolışi 80 sor təmom bey. Xanəli Tolışi 80 sornəni soraqardış Tolışstoni har tonədə bənəy idi zınə bey. Şairi piəkəson ım sorəqardışışon penə fayədə dəvoniyə nızınon, bə şairişon çəşiruşini doəşone. Tolish Media portalən ıştə tono bə şair Xanəli Tolışi çəşiruşini doydə.

Xıdo bə əy dırozə jimon bıdo, əy bə çe əmə milləti vey nızıno. Ruj əv ruj bıbo, Xanəli mamu Tolışstoni dəvlət bərpo beədə əv ijən bənəy tolışə sipirişi ehando, bə əmə ro nişo bıdo. Xanəli mamu Masali rayoni Ğızılıvo diədə çe moəmo bıə.Əv Ğızılıvo Dəlokobə kujədə jidə, hejo bı kujə miyonə məktəbədə ustodış kooş kardəşe. Xanəli Tolış, ısətən qirisəy, ıştə milləti roysə bə həşe. Bı roədən Xıdo  bə yolə şairi ovnd bıdo!

Tolish Media