Turkiyə prezidenti muşavir, əmniyətə ınən xarici siyasətə komitə uzv Mesut Hakku votəyon Rusiyə tolışə diasporə rəhbər, Rusiyə prezidenti tono mıllləton əlaqə şurə uzv İsmail Şabanovi reaksiyə.

Mesut Hakku Haber tv efirədə Тurkiyə de Rusiyə muharibə karde hozzo be votedə. İıştənən Rusiyədə 25 mln mısılmonon bə turkiyə dəstək be, de çəvon dasti Rusiyə dılətono vılo karde bə zıvon vardedə: «Navkoən əmə de Rusiyə 16 kərə, davemon kardə, lozim bıbi ijən bəkamon, çəmə ğisasən vey zumand bəbe».
İsmail Şabanov votdə, sıxani rosti Turkiyə rəsmionku joğo şey çəş kardə be:

“Az hisob kardəm Mesut Hakki votəyon bə hiç diplomatik çərçivə dəvıjqidəni. In votəyon nohəxin, turkiyə prezidenti muşaviri çanəndə kolhınd be nuşo doydə. Sıftə imiən bıvotom, Rusiyə mısılmonə xəlğon ıştə dini inən milli adət ənənon oğəte roədə hiç problemşon ni. Rusiyədə jimon kardə xəlğon, turkiyədə jiyə xalğonku fərğin ıştə mədəni, dini, əlidə milli həxon realizə karde ro har imkonşon hıste. Har xalği ıstə pərçəm, himn, qerb inən jo millu rəmzonış hıste. Rusiyədə jiyə mısılmonon həzo sorone de əlidə mısılmon nıbə xəlğon iyo jimon kardən.İvrədə bə vətəni ğolloğ kardən, ıvrədə vətəni ro con dodən, xun ekardən. Hojo joğo bə, çimi bə peştən joğo bəbe.

Rusiyə hokumət bə həmmə dini inən milli numəyəndon de hurməti dıçkedə. Rusiyə prezidenti tono milli ınən dini məsəlon şura ko kardə, har miyonıdə bə problemi operativ həll kardən.

Əve az turkiyə prezidenti muşaviri votəyon be əsos, provokasiyə hisob kardəm. In votəyon bə Rusiyə mısılmonon şər ğandeye zınedəm, əve tələb kardəmon turkiyə rəsmiyon çimi bə peşt ıştə votəyon no peğət bıkon”