Məlume ki, çe Suriya ərazi şimalo-ğərb hissə çe Turkiyə hərbiə ğıvvon nəzarəti jitonoe. Çe DAİŞİ vişmandəyə terrorə qoruhon həmonə vıronədə ğəror qətəşone.

Suriya muttəfiğon bə Turkiyə tərəfi imkan doşone ki, əvoni çe suriyavojə muxalifə siyasiə ğıvvonku co bıko, və həmonə terrorə qoruhi ıştə nəzarətədə mandə əraziku beğando. Bımi ro Rusiya tərəfi hətto bo Ankara hokuməti konkret vaxtşən co karde. “Nur az.com” bə “Sputnik” sayti istinadən xəbə dodə ki, Rusiya Xarici Koon Vəzarəti mətbuatə katib Mariya Zaxarova Turkiyəku tələb kardəşe ki, terrorə qoruhon çe suriyavojə muxalifətku co bıkardo. De həmonə qoruhon nomi əvəz karde, çəvon mahiyyət əvəz bedəni, bə səbəbən Moskva jıqo vəziyyəti ğəbul kardedəni. Zaxarova həmən ğeyd kardəşe ki, Moskva bə Ankara de terrorə qoruhi əlağədar doə vaxt rujbəruj kam bedə. Suriya həmonə ərazi ki, Turkiyə nəzarətədəy, əyo “Cəbhətun-nusra” terrorə təşkilat çe muttəfiğon zərbəku bə kəno mande ro ıştə nom əvəz kardəşe. Rusiya hokuməti mətbuatə katibiən bə ım fakti işarə jəşe ki, Rusiya tərəf bə jıqo hərəkəti rozi ni,  və Turkiyə vədə bəştə təəhudi əməl karde tələb noəşe.

“Qafqaz.ir” saytən ıştə qıley məğalədə DAİŞ-i Turkiyə və Az.R -ədə rişə ğande barədə nıvıştəşe ki, ım terrorə ideoloqiya həm Turkiyə , həmən Az.R-ədə inkişafış hestbe. Çimi səbəbən ey çe devləti tərəfo himayə kardəyədəbe. Imiən bey vardışe bekardışe ki, çe ım devləti şəhrıvandono çand həzo odəmon, hətto deştə ailə bə ico Suriyadə terrorə qoruhon tərkibədə canq bardedəbin. Isət Dəməşğ hokuməti ərteşi ğıvvon deştə muttəfiğon koməki bə DAİŞ-i orəx beşə vaxtədə Turkiyə çəvon vişmandəyon xilas karde ro bə  muxtəlifə manevron dast ğande hiçən təsaduf ni. Kali xəbə resurson həmonə qoruhonədə hətto bə Az.R ərazi dəğande barədən işarəon pevolo kardedən.