TolishMedia informasiyə agentəti muxbir xəbə doedə ki, İyulə mangi 14-ədə şangovəsəy Boku iyən çand gılə co şəhəronədə həzo-həzo odəmon de səfərbərəti iyən «ermənion dasto Ğərəboği ozod karde” tələbon mitingon dəvuniəşone.

Im etirozinə aksiyə vey rə bə Boku rejimi zidd anti-hukməti mitingi pegardə. Etiroz kardəkəson çı Boku diktator Əliyevi istefo tələb kardəşone iyən de zuy bə Milliə Məclisi dılə dəşən.

Ğıvvə koəvonon dastələvon, ovi şırnə iyən çəşon arsin kardə ğaziku istifodə kardəşone iyən xəyli etiroz kardəkəson həbs kardəşone.

Bə yod dəğandəmon ki iyulə mangi 12-ku Ozobiconi de Ermənistoni marzədə Boku dovləti avanturə nəticədə hərbiə əməliyotin bino kardə bin. Ozobiconi hərbiə ğıvvon bə erməniə Çinari, Aygepar, Nerkin Paravakar səbəsoə məntəğəon iyən Berd şəhəri bombə ekardəşone, hətto tankonku istifodə kardəşone, əmma erməniə ğıvvon vey şiddətinə cəvob doeədə Ozobiconi ləşğəri 3-nə korpus məhv kardəşone, çand gılə bepilotə təyyarəon bə zəmin eğandəşone. Ğeyd bıkəmon ki erməniə ləşğəri cəzo hərəkəton nəticədə rəsmən Ozobiconi hərbiə ğıvvon 11 hərbkoron, əzcumlə barzə vəzifəynə hərbiə ğollığkoron, generalon, polkovnikon iyən mayoron kıştə bən.